Shillong, Nailar 12: Ka kynhun jong ka United Democratic Party (UDP) ba la ïalam da u myntri sorkar u Bah Lahkmen Rymbui ka la kyntu ïa u myntri kam poh ïing jong ka sorkar pdeng u Amit Shah bad ïa ka sorkar kmie ban pynkloi ban pynurlong ïa ki katto katne ki mat jong ka jylla kiba la sahteng, kynthup ïa ka Meghalaya Residents Safety and Security (Amendment) Bill, 2020 bad ka jingpyntreikam ia ka Inner Line Permit.
Haba kren bad ki lad pathai khubor mynta ka sngi Balang, u bah Rymbui u la ong ba ka MRSS (Amendment) Bill, 2020 ka dang sahteng wat la mynjur da ka ïing dorbar bad la phah sha u Lat, uba naduh katei ka por u la phah sha ka tnad kam poh ïing.
“Ngi tip ba ka Meghalaya Residents Safety and Security (Amendment) Bill, 2020 ka dang sah teng wat hadien ba la mynjur da ka Assembly bad la phah sha u Lat, bad u Lat u la phah sha ka tnad kam pohïing.Kumta, ngi la kyrpad ïa u myntri kam pohïing ka sorkar pdeng ba un peit bniah ïa kane ka aiñ khnang ba ngin ïoh ïa ka jingmynjur,” ong u Bah Rymbui.
Katkum ka jingong jong u, u Shah u la jubab ba ki don “ar ne lai tylli ki mat ba ka jylla kan hap ban ïakren, hadien kata ka sorkar kmie ka lah ban mynjur ïa ka.” “Ngim pat tip kiei kita ki mat tad haduh ban da phah shane, ynda ngi la ïoh ngin sa tip kiei kita ki mat bad ngin sa ïakren ïa ki,” u la bynrap.
Halor ka jingdawa ILP, u bah Rymbui u la ong ba ïa kane ka kam la ïakren bniah bha,”Ngi la ïakren ruh halor ka resolution jong ka ILP.
U la ong ba ïa kane hap ban pule bniah namar ba ka ktah ïa ki jylla bapher bapher. Kumba phi tip ngim dei kiba la pynkyrpang.Ngin sa rah ïa kane ka mat na ka por sha ka por,” u la ong.
U la kdew ba katba ka Sixth Schedule, ka Land Transfer Act bad kiwei kiwei ki aiñ ki ai jingïada, “kat nang mih ki sngi, ngi la sngewthuh ba ngi donkam shuh shuh ïa ki aiñ ban ïada ïa ki trai ri trai muluk jong ka jylla.”
Ka kynhun ka la ba jur ruh ban pynrung ïa ka ktien Khasi bad Garo ha ka Khyrnit kaba phra jong ka riti synshar ka ri.
“Ngi la rah ïa ki mat ba kynthup ïa ka jingdonkam ban pynrung mardor ïa ka ktien Khasi bad ka ktien Garo ha ka Khyrnit kaba phra jong ka riti synshar ka ri India.Halor kane, u Shah u la pynthikna ba ka jingïaid lynti ka dang ïaid shakhmat bad u kyrmen ba kin lah ban pyndep ïa ka mat bad ba ngi dei ban long kiba ïaishah, bad shisien ba ngi ong ïa kane kata ka mut ba ngi don ka mon ban leh ïa kata,” ong u Rymbui.
La pynsngew ruh ïa ka jingpynslem ban pynkynriah ïa ka Harijan Colony na Them Iew Mawlong.
U Bah Rymbui u la ong ba ka sorkar jylla ka la buddien ïa kane ka kam naduh u snem 2018-19 bad mynta ka donkam ban ai ïa ki jaka jong ka defence land.
“U myntri kam pohïing jong ka sorkar pdeng u la mynjur ba ka la don ka jingiakren bad ka bor defence kumno kin lah ban ai ïa ka jaka jong ka defence land na ka bynta katei ka jingthmu”, u la ong.
