Khih khohreh nyngkong eh ka NPP ban leit tynruh ïa ka ishu FRCA sha ka sorkar pdeng : Conrad

By Mawphor Editor On Aug 13, 2026

Shillong, Nailar 12 : U Myntri Rangbah ka Meghalaya, Conrad K. Sangma, ha ka sngi Balang u la ong ba na baroh ki seng saiñpyrthei, dei ka NPP kaba nyngkong eh kaba khih khohreh ban kynduh ïa ki nongïalam jong ka sorkar pdeng ban pynpaw ïa ka jingsngewkhia jong ki halor ka jingthmu pynkylla ïa ka Foreign Contribution (Regulation) Act.
“Ha kaba sdang ba la wanrah ïa ka Bill, ka NPP ka dei ka seng kaba tang marwei kaba la shim ïa kane ka mat ha kata ka por. Nga la ïalam ïa ka kynhun na CBCI, kynthup ïa u President bad Secretary General, ban leit ïakynduh ïa u Kiren Rijiju,” ong u Myntri Rangbah haba kren bad ki lad pathai khubor hadien ka prokram kaba long ha ka nongbah.
Nangta u la bynrap biang ruh da kaba ong, “Lada don kano kano ka seng saiñpyrthei kaba nyngkong eh kaba la shim ïa kane ka mat, ka dei ka NPP.”
U la ïathuh ba hadien kata, kawei pat ka kynhun na Meghalaya ka la leit ïakynduh ïa u Myntri ka tnat Kam Pohïing ka Sorkar Pdeng, u Amit Shah, ban pynpaw ïa ka jingsngewkhia halor kane ka bynta.
“Ngam kynmaw ba don kano kano kawei pat ka seng saiñpyrthei kaba la shim ïa kane ka mat bad ïakren beit bad ka Sorkar Pdeng ne bad ki Myntri Sorkar. Hynrei hadien ba ngi la leh ïa kane, ngi la ïohi ïa kiwei ki Myntri Rangbah bad kiwei ki seng saiñpyrthei ruh ki la sdang ban shim ïa kane ka mat,” u la ong.
U Conrad u la pynshai ba ka jingshimkhia jong ka NPP halor kane ka mat kam dei na ka daw saiñpyrthei.
“Ka long namar ba ngi don ka jingïadei kaba jan bad ki kynhun bapher bapher. Haba ngi la ïoh ïa kane ka khubor bad ngi la sngewkhuslai, ngi la shimkhia mar mar bad lum ïa ka kynhun,” u la ong.
U Myntri Rangbah u la pdiang sngewbha ïa ka jingphah ïa ka Bill sha ka Joint Parliamentary Committee (JPC), bad u la pynpaw ka jingkyrmen ba ki jingkhuslai jong ki kynhun bapher bapher, ki Balang bad kiwei ki kynhun niam kin ïoh ïa ka jingshah shkor.
“Ngi ai khublei ïa ka Sorkar ba mynta la phah ïa kane ka mat sha ka JPC. Ngi kyrmen ba baroh ki jingkhuslai na ki kynhun bapher bapher, ki Balang bad kiwei ki kynhun niam yn sa sngap ïa ka jingpynsngew jong ki.”
U la ban jur ruh ba ka donkam ban pynneh ïa ka jingïaineh hapdeng ka jingpynbeit ïa ka jingwan tuid ki jingkyrshan na shabar ri bad ka jingïohlad jong ki kynhun ban bteng ïa ki kam babha ba ki la leh.