Kular u Amit shah ïa ka UDP: Ïa ka FCRA yn rah sha ka Joint Parliamentary Committee ban ïamir bniah

Shillong, Nailar 12: U myntri kam poh ïing jong ka sorkar pdeng u Amit Shah u la pynthikna ïa ka kynhun jong ka United Democratic Party (UDP) ba ki jingthmu ban pynkylla ïa ka Foreign Contribution (Regulation) Act kin nym long kiba phai dien bad ba ïa kane ka Bill yn rah sha ka Joint Parliamentary Committee ban ïamir jingmut kham bniah
U Lahkmen Rymbui uba dei u nongialam ka UDP uba dei ruh u myntri ka kynhun myntri uba la ïalam ïa ka kynhun sha New Delhi ha ka sngi Balang, u la ong ba ka seng ka la pynbeit ban ïa kynduh hapdeng ka jingsngewkhia ba ka jingpynkylla ïa ka FCRA ka lah ban wanrah ïa ka jingeh ha ka jylla Meghalaya.
“Katkum ka jingsngew jong nga, ka jingleh jong ka sorkar kmie ban pynkylla ïa ka FCRA kan buh jingeh shibun lada kam don ka jingshai, dei na kata ka daw ba nga ong ba ngi pyrshang ban ioh ïa kynduh bad u myntri kam poh ïing ka sorkar pdeng ban ïakren ïa kane bad ban sngewthuh kham bha ïa kane”, la ong u bah Rymbui.
“Nyngkong, wat lada mynjur ïa kane ka aiñ, kan nym long kaba peit shadien, nga sngew ba kata ka dei kawei na ki jingshai ba ngi la ïoh, kaba ar, ïa kane ka Bill yn sa phah sha ka Joint Parliamentary Committee khnang ba ki nongshim bynta ruh kin ïoh ban ïasam ïa ki jingmut jong ki, khnang ba kane ka aiñ kan nym ktah ïa baroh,” u la ong.
Ka kynhun ka la kyntu ruh ba lada pyllait ïa ka Citizenship Amendment Act na ka bynta ka Jylla Meghalaya, dei ban pyrkhat kumjuh ïa ka FCRA da kaba kdew ïa ka jingsngewkhia halor ki bor ba la buh kyrpang bad ki jaka puta.
Hynrei u Shah u la pynshai ba katei ka jingpynkylla kam shym la thmu ïa kano kano ka jaitbynriew, da kaba kdew ba tang kumba 16% na ka jingnoh synniang kaba la antad ba T. 22, 000 klur tyngka nabar ri man la u snem ka leit sha ki jaka pule Khristan.
“Ka jingïalang ka la long kaba seisoh bad nga pynpaw ïa ka jingsngewnguh ïa u myntri kam pohïing ka sorkar pdeng uba la sngap ïa ngi bad u la ai ruh ïa ngi ïa ka lynti ïaid jong ka sorkar kmie ba kumno ban leh ïa ki mat ba kongsan kiba ïadei bad ka FCRA, ka jingtih dewïong, ka MRSSA, ka ktien Khasi & Garo bad kiwei,” bynrap biang u bah Rymbui.