La rakhe ïa ka sngi burom ki nonghikai ha Ri-Bhoi, pynkup burom ïa ki nonghikai ba len lade

Nongpoh, Nailur 05: Ka tnad pule puthi jong ka Ri-Bhoi District mynta ka sngi Saitjaiñ ka la pynlong ïa ka jingïarakhe ïa ka sngi burom ki nonghikai (Teachers’ Day) kaba 65 ha Nongpoh Parish Hall, ban ai ka jingïaroh bad ka burom ïa ki nonghikai kiba la trei shitom ban kyntiew ïa ka pule-puthi bad ban tei ïa ka lawei jong ki khynnah bad samla pule.
La pynlong ïa kane ka jingïalang da ki ophis jong u Joint Director of School Education and Literacy, District School Education Officer (DSEO) bad Sub-Divisional School Education Officer (SDSEO), ka Ri-Bhoi District, da ka thong ban ithuh bad pynkup burom ïa ka jingshakri kaba kyrpang jong ki nonghikai ha ka liang ka pule-puthi.
Ka sngi burom ki nonghikai, kaba la ju rakhe man u snem ha ka 5 tarik Nailur, ka dei ruh ka sngi kha jong u khraw pyrkhat bad u nongïalam uba la noh synñiang shibun sha ka liang ka pule-puthi, u Dr. Sarvepalli Radhakrishnan, uba long ruh u President barim jong ka Ri India. Kane ka sngi ka long ka lad ban ai ka jingïaroh ba kyrpang ïa ki nonghikai kiba ym tang ba ki ai jingnang jingstad hynrei ki don ruh ka bynta kaba kongsan ban pynwandur ïa ka jinglong bad ka lawei jong uwei pa uwei u samla pule.
U Dr. Celestine Lyngdoh, MLA ka Umsning bad Chief Whip jong ka Sorkar Jylla, u la long u Kongsan ha kane ka jingïalang, katba u Bah Mayral Born Syiem, MLA ka Nongpoh, u la shim bynta kum u symbud kongsan. Ha ka jingïalang la wan ïashim bynta ruh da u Dr. Abhishek Saini, Deputy Commissioner ka Ri-Bhoi District, Bah R. Shadap, DSEO, Ri-Bhoi, P.P. Yadav, SDSEO, ryngkat bad kiwei ki ophisar, ki riew rangbah, ki nonghikai bad ki khynnah skul na kylleng ka distrik.
Kawei na ki bynta ba kongsan jong ka jingïarakhe ka long ka jingsam ïa ka District Award sha u Babu Aibor Singh Kharpan, Assistant Teacher jong ka Nehru Memorial Higher Secondary School, Umsning, kum ka dak jong ka jingithuh ïa ka jingshakri kaba kyrpang jong u ha ka liang ka pule-puthi bad ïa ki jingpyrshang jong u ban kyntiew ïa ka jingnang jingstad jong ki khynnah lyngba ka shlem pule.
Nalor kane, la pynkup burom ruh ïa ki Principal bad Headmistress jong ki skul bapher bapher ka Ri-Bhoi District, kiba la len lade ban tbeh jingshai khamtam ki skul kiba don kham sha kyndong bad khappud ka district da ki khusnam kyrpang, kum ka dak ban ithuh ïa ka jingshakri jong ki ban kyntiew ïa ka pule-puthi ha ka distrik.
La pynphuh pynphieng ïa kane ka sngi lyngba ki jingrwai bad ki skit lyngkot ba la pyni bad shim bynta da ki khynnah skul, kum ka dak jong ka burom bad ka jingsngewnguh ïa ki nonghikai kiba la aiti ïa la ka por bad ka bor ban ai jingnang jingstad, ban pynkhlaiñ ïa ki jinglong babha, ka akor bad ka burom, bad ban ïalam ïa ki khynnah sha ka lawei kaba phyrnai.
Haba kren ha kane ka sngi naka liang ki kongsan kila ai ka jingïaroh kaba khraw ïaka jinglen lade ki nonghikai kiba la shakri met bad mynsiem ban pynkylla dur ïaka jinglong jong uwei pa uwei u khynnah ryngkat ka tbeh jingshai ban sam ïaka jingnang jingstad kaba wanrah ka jingkylla dur haka imlang ka sahlang bad nalor ki kmie ki kpa dei tang ki nonghikai kiba kwah ba ki khynnah kin kham leh bha bad kham khraw ban ïaki ba kin longbriew manbriew haka jingim bad ka lawei ka jong ki kan long kaba phyrnai.