Yn ap shwa ka KSU ïa ka kaiphod hashwa ban shimrai halor ka Shree Cement

Shillong, Risaw 16: Ka KSU East Jaiñtia Hills District hapoh ka jingïalam jong u Pynshai Kupar Dkhar Assistant Secretary KSU bad u KS Suchiang General Secretary KSU East Jaiñtia Hills ha ka jingleit hajir ban pynsngew hakhmat ka fact finding committee halor ka jingbuh ïa ka Project shna dewbilat jong ka Shree Cement ha Lumsyrman, Daistong ki la pynsngew bad rah ïa ki lai tylli ki presentation ba kynthup ïa ka EIA jong ka Shree Cement kaba don bun ki jingartatien, jingdon ki krem kiba itynnad ha kane ka thaiñ, nangta ka jingdon ki mawbynna ha Lum Thangsyiem.
Haba ïadei bad kane ka jingshah khot hapoh ka Fact finding committee ba la thaw da ka sorkar na ka liang ka KSU ka la ong ba kam pat lah ban ong la ka sngewhun ne em ïa kane ka jingïakren bad ka Committee, hynrei kan ap shwa tat haduh ba ka Committee kan pynmih ïa ka result jong ka kaiphod.
Na ka liang kitei ki nongïalam ki la ïathuh ba ka thaiñ Daistong ka don shibun ki Krem kiba lah ban khring ha kiba bun ki nongjngohkai pyrthei bad kumjuh ruh ki mawbynna bad ki jingdon jong ki wah bad ki jaka rep, kumta halor kane haba kren sha ki lad pathai khubor na ka liang ki nongïalam jong ka KSU ha ka presentation ba ki la ai sha ka Fact Finding Committee ki la banjur ïa ka jingdonkam ban pynneh pynsah ïa kitei ki krem bad kumjuh ruh ban tyngkai ïa ki khnang ba kin long ka jingkhring ha kiba wan jngohkai pyrthei sha katei ka thaiñ.
“Ngi la banjur ïa ka Committee ba kan pynlong ïa kitei ki jaka kiba khring ha kiba wan jngohkai bad kumjuh ruh ban ïada ïa ki tyllong um bad ki jaka rep khnang ba kan ym ktah ïa ki longdien jong ka pateng ban wan, naba ka mining site jong ka Shree Cement ka don hajan jong kine ki jaka kiba donkam ban ri kyndong bad ban pynneh pynsah kumta kum ka seng ngi banjur ïa ka Committee ba kan shim khia ïa kine ki jaka ym ba kin shah pynjulor noh tang na ka daw jong ka jingwan jong ka Shree Cement,” ong u General Secretary da kaba bynrap ruh ba ha kane ka jingïakren bad shah khot hajir ha ka Committee ka seng ka la banjur bha halor ka jingdonkam ban pynneh pynsah ïa ka sawdong sawkun ne ka Environment.
Ha kaba ïadei pat bad ka jingjia huri hura hapoh ka jingpynlong ïa ka jingbishar paidbah jong ka Shree Cement na ka liang kitei ki nongïalam ki la ïathuh ïa kane la dep ban ujor sha ka Crime Branch hynrei haduh mynta ym pat ïohi satia ba ki la leh eiei halor kane bad kato ka jingjia ha ka 31 tarik jong u bnai Nailur.
“Ngi kwah ban buh ka jingkylli na ka sorkar ba kumno haduh mynta ba la dap sa ar bnai lai bnai ruh ym pat leh eiei hynrei la nangkem shikem ïa ki dkhot jong ngi bad tang kawei ngi kwah ban ong ba ngim kwah ba kane ka Fact Finding Committee kan kylla long noh kum kata ka Fact Killing Committee,” ong ki nongïalam ka KSU.