Shah thok u nongwad RTI ïohpdiang ki report da kiba ladep ban tah da ka sia lieh
La shem taïew ngan leit ban ujor sha u CIC
Shillong, Risaw 16: U Bah Disparsing Rani uba dei u wei na ki nongwad RTI u byrngem ban ujor sha u Chief Information Commissioner (CIC) hadien ba la don ki ophisar kiba tah siah lieh ïa ki report jong ka RTI kaba la aiti sha u halor jingwad jingtip halor ka jingshim jaka jong ka Indradhanush Gas Grid Limited (IGGL) ha Ri Bhoi District ban pyniaid ïa ki pipeline.
Haba kren bad ki lad pathai khubor u Bah Disparsing u la ïathuh ba ha ka 23 tarik u bnai Jymmang u la pan da ka RTI na ka ophis jong u DC ka Ri Bhoi Dististrict bad ka shim por haduh san bnai ban ioh ïa kane ka RTI.
Shuh shuh u la ong ba ha ka 3 tarik u Jylliew na Nongppoh la ong ba la phah sha ka Indradhanush Gas Grid Limited da kaba bthah ban ai ka RTI report bad hadien ba la tuklar ka ophis jong u Myntri Rangbah ha ka 25/7/2026 la phah sha u DC ka Ri Bhoi bad u DC ka Ri Bhoi u la phah sha ki competent authority ne ki bor ba dei khmih ha Secretariat.
Ynda la poi ha Secretariat u Bah Rani u la ïathuh ba ym don bad kynnoh ba kane ka bor ba dei khmih ha secretariat dei ka Kong I Mawjaw kaba dei ka IAS bad kane ka kong Majaw la iathuh ba la phah biang sha ka Indradhanush bad hangne nga la shah pynshad shrieh kum u nongwad RTI, u la ong.
Related Posts
Shuh shuh u Bah Rani u la iathuh ba u la ioh ka order na ka Indradhanush bad haba kynduh ïa ki bor ba dei peit ki ong ba ka RTI ka don ha ophis bad hadien kata kila khot ïa ka Indradhanush bad hadien nga sa ioh ka report.
“Hadien ba nga la ioh ki report ha kaba ïadei bad ka jingshim jaka ha Raid Kynrem ha Mawpun ki paw 13 tylli bad ha Nongpyrdet ka paw 5 tylli bad ïa kiba la leh jinglum jingtip la lap ba baroh la tah sia lieh lut halor ka kyrteng ki trai jaka bad ka jingheh” ong u Bah Rani.
Shuh shuh u la ong, Kane ka jingpynkyllain ka don eiei imat sha lyndet ba tah sia lieh ïa ki jingheh jong ki jaka bad dei hangne ba nga sngewthuh ba u wad nong RTI u la shah thok.
Halor kane ka jingshahthok u Bah Rani u la maham ïa ki ophisar kiba leh tam jong ka sorkar da kaba tah sia lieh ïa ki jubab RTI kaba la kylla long kum ka raibi hapoh ka jylla jong ngi.
Shuh shuh u Bah Rani u la ong ba lada u ujor sha u CIC kine ki ophisar kiba tah sia lieh kin lah ban shah pynshitim halor ki lai bynta, kawei kadei ka jingshah dain kuna ba 25 hajar tyngka, kaba ar ka jingshah pynshitom kaba lah ruh ban ktah ïa ka promotion ha ka kam ba ki trei bad kaba lai ki lah ban ngat ha ka kam runar.