Nongpoh, Risaw 16: Ki ar ngut ki MLA ka Ri-Bhoi ba kynthup ïa u Bah Mayral Born Syiem MLA ka Nongpoh, Dr Celestine Lyngdoh MLA ka Umsning lem, ki bor district ka Ri-Bhoi naduh u Dr Abhishek Saini Deputy Commissioner lem bad ki ophisar, ki nongmihkhmat ka NHIDCL bad Nongpoh Town Committee mynta ka sngi kila shong jingïalang ha DRDA Hall ha Nongpoh ban ïakren naka bynta ban buh ïaka jingtyrwa ban pynbun ki jingkieng ïaid kjat haki jaka ba donkam bad kongsan haka thaiñ Nongpoh bad Umsning naka bynta ka jingshngaiñ ki paidbah.
Haba kren sha ki lad pathai khubor hadien ka jingïalang naka liang u Bah Mayral Born Syiem bad u Dr C Lyngdoh kila ong ba kane ka jingïalang ka long ban pyrkhat sani haba ïadei bad ki kam pynroi bad kumjuh ruh ka jingshngaiñ jong ki paidbah haba leit ba wan ha surok bah National Highway ha kaba kum ki nongmihkhmat kila tyrwa ban dang pynbun shuh shuh ki jingkieng ïaid kjat nalor kiba la thmu ban shna bad donkam ban pyndep kloi katba lah ïa kitei ki jingkieng ïaid kjat.
Shuh shuh ha katei ka jingïalang la ioh ruh ban ïakren kumno ban weng ïaka jingshlei um ban pynkhuid ïaki nala bad ruh ban buh ki jingshai ha shi lynter u surok, ban pynjrong shuh shuh ïa u service road u ba kut mynta tang haka shnong Mawdiangum bad ban pynpoi haduh ka shnong Mawtnum bad naka bynta ka jingbit jingbiang bad ban peit ïaka jinglong jingman jong ki jaka la rai ruh ban pynlong da ka jingjurip lang haka 19 tarik mynta u bnai ban pynthikna ïaka jingbha bad jingshngaiñ ha shilynter u surok bah National Highway.
