Ba trei torti ki kontraktor ïa ka JNV Mawsynram bad jingbym biang ka Network Jio

Mawkyrwat, Risaw 16: Ka FKJGP South East Khasi Border Circle ha ka jingïalam u Samla Kyrmen Shangdiar President ka Circle hadien ka jingjurip ïa ka JNV Mawsynram Phase bad Pbase-B ha ka 2 tarik u Risaw, 2026 mynta ka sngi ka la leit ban buh da ka jingthoh ha u Regional Office JNV Shillong ba kan tuklar lem ïa ka jingtrei torti u contractor na Assam ba hap hapoh ka jingpeit jong ka MTDC na Manipur bad ha kane ka jingïakynduh ïa u heh Officer jong ka JNV Shillong la lap ba na ka liang jong ki ruh ki la lap ïa kane ka jingtrei torti, bad ki la dep ban report sha ka MTDC hynrei kim suidñiew bad ki pynïaid shaphrang ïa ka kam.
Kumta ka seng ka la kyntu bad dawa na ka MTDC ban buh da ka joint inspection ïa katei ka kam khnang ba kan nym buh ha ka jingma ha kaba tei ïa katei ka skul ka ban ai ka jingshakri ïa ki khynnah kiba hap hapoh katei ka skul.
Ha ka jingïakren u Regional Officer la ong ba une u ophisar ula kular ban sa shimkhia bad ban pynbud ïa ka jingthoh sha u Manager Director ka MTDC ban tynsad ïa ka jingthoh kaba wan na ka FKJGP khnang ban pynskhem bad pyntikna ba ka don ka jingtrei kaba ym i shngain? ha katei ka skul JNV.
Shuh shuh ka seng ha kane ka jingiïakren la kyntu ïa ka office JNV ban leh kloi ban pynkynriah ïa ki khynnah na ka jaka hikai bad jaka sah ba shipor sha ka jaka kaba neh (permanent), namar na ka liang ka CPWD ka la dep ban aiti sha ka JNV ïa ki Building kaba la dep trei ha ka Phase-A kaba kynthup naduh ka Office u Principal, jaka ki staff bad ki jaka sah ki khynnah kynthei bad shynrah bad kumjuh ïa ka jaka hikai (school building).
Ka seng ha kane ka juh hi ka sngi namar ka jingbym biang ka Network Jio ha ki ar tylli ki thaiñ ne ki area kata jong ka Mawsynram bad Lawbah da ka jingsngewkhia ki la leit ban leit ïa kynduh ïa u heh ophisar ba pynïaid ïa ka network bad ki tower.
Namarkata, la ong ba ha kane ka jingïakynduh na ka liang jong ki la pynpaw ïa ka jingeh ba na ka bynta ka Mawsynram ka dei na ka daw ba dang trei ïa ka surok Phlangwanbroi sha Ranikor bad ka la ktah ïa ki wirefiber hynrei na ka bynta ka Lawbah ka daw ka dei ba la shutdown lane switchoff namar ka jingbym ïa sngewthuh jingmut u trai jaka bad ka company hynrei ïa mynta ki dang wad ïa ka jaka ban buh da uwei u tower.
Kumta ka seng ka la ai por hapoh ar bnai ban pynbiang ïa ka network ha ka Area Mawsynram bad na ka liang jong ki ki la kular ban pynbiang hapoh ka por ba la ïa pynbeit, hynrei na ka bynta ka Lawbah Area na ka liang ka Office Jio Shillong kin sa hiar ban leit ban survey ïa ka jaka ha kine ki taïew ban wan ha kitei ki shnong bad na ka liang ka seng ka la ai jingmut ruh ba lada ym ïoh jaka ha kawei ka shnong dei ban pyrshang ban wad na ki shnong ba marjan khnang ba ka network kan biang bad ki paitbah kin myntoi haba pyndonkam ïa ka simcard Jio.