Pynkup burom ka Ri Bhoi College ïa 65 ngut ki Graduate

Nongpoh, Risaw 16: Ka Ri-Bhoi College mynta ka sngi ka la pynlong ïa ka Graduation Ceremony ban pynkup burom ïa 65 ngut ki samla pule kiba la pyndep ïa ka jingpule ha ka kyrdan Graduate, kum ka dak jong ka jingithuh ïa ka jingtrei shitom bad ka jinglah jong ki ban pyndep ïa ka jingpule.

Ha kane ka sngi, u Bah Mayral Born Syiem, MLA ka Nongpoh, u la shimbynta kum u kongsan, ha ryngkat ka jingdonlang ka Principal jong ka College, ka Dr. E. Kharkongor, ka Kong B. Blah, kaba dei ka khun ksiew jong u Dr. D.D. Lapang, ka Kong D. Syiem, ka khun jong u Bah R.I. Masharing, uba long u Principal barim jong ka Ri-Bhoi College, ki nonghikai jong ka Ri-Bhoi College bad ka Northern Ri-Bhoi College, lem bad ki samla pule.

Ha kane kajuh ka sngi, nalor ka jingpynkup burom ïa baroh 65 ngut ki samla pule, la sam ruh ïa ki khusnam kyrpang sha ki samla pule kiba la leh bha ha ka jingpule ba kynthup ïaka The D.D. Lapang Meritorious Award la ïohpdiang da ka samla Amanda Kharwanlang na ka Department of English, katba ka The R.I. Masharing Excellence Award la ïohpdiang da ka samla Lisha Lyngdoh, kaba dei ruh na ka Department of English.

Haba ai jingkren ha kane ka jingïalang, u Bah Mayral Born Syiem u la pynpaw ïa ka jingsngewkmen kaba khraw ban ïadon bynta ha kane ka sngi kaba kyrpang. U la ong ba kane ka sngi ka pynkynmaw biang ïa ki por ba u dang long samla pule, bad u la pynpaw ba ka long ka burom kaba khraw ïa ka shlem pule ban pynkup burom ïa ki samla kiba la pyndep ïa ka jingpule shwa ba kin jam sha kiwei pat ki lynti ha ka jingim.

U la ai jingïaroh ruh ïa ka Ri-Bhoi College kaba la long ka shlem ai jingnang jingstad kaba kongsan ïa ki samla pule jong ka them Ri-Bhoi. U la pynkynmaw ïa ka jingkitkhlieh bad ka jingiohi jngai jong u Dr. D.D. Lapang, uba la noh synñiang ban seng ïa kane ka kolej, khnang ba ki pateng ban wan kin ïoh ïa ka lad ban pule bad ban tei ïa ka lawei kaba phyrnai.