Mih ki paidbah ban ïarap kylla ban wad ïa kiba dang jah ha ka jingshlei um ha ri Nepal

Nuwakot (Nepal), Nailur 05 : Watla ka jingsngewsih ka dang ban hadine ba ki la duh noh ïa ki baieit ba thoin ha ka jingwan lyngshop ka mariang ha bun ki jaka jong ka ri Nepal hynrei kim shym la pynsngew ïa kata pynban ki la mih shakhmat ban ïarap kylla pat ïa ki kynhun ai jingïarap katba lah la i bor la ka long naduh ban shet bam na ka bynta jong ki bad kiwei kiwei ki jingïarap kiba kyrkieh.
Kiba bun na kine ki kynhun ba leit ai jingïarap ki dei ruh kiba dang shu lait im ïalade na katei ka jingjia kaba shyrkhei bha kaba la syllad tyngeh ïa ka ri Nepal haduh ba ki la poi palat hajar ngut ki briew kiba la khlad bad da ki hajar kiba dang jah haduh mynta.
U Sudip Kumar Neupane, 31 snem, u la lait im na ka jingshlei um ha ka 26 tarik Nailur, kaba la rong noh ïa u para jong u bad uwei u paralok ba jan.
Hadien ba u la pynlut ar sngi ha ka jingïam briew, u la ïasnoh lang ha ki kam jingïarap, da kaba sam ïa ka bam bad ki jingïarap kiba bun jait sha ki briew kiba la hap ban mih noh na ki ïing ha Rasuwa.
Ka jingshlei um kaba jur, kaba la pynmih da ka jinghap bad twa jong ki lum thah hajan khappud Nepal-Tibet ha ka 26 tarik Nailur, ka la pynjot ïa ki shnong bad ki shnong rit ha ka thaiñ shatei bad pdeng jong Nepal, da kaba shim palat 1,300 ngut ka jingim briew, katba kumba 5,000 ngut ki dang jah.
U Neupane u la ïarap ban maham ïa ki nongshong shnong shaphang ka jingshlei um kaba wan ban syllad, hynrei u la shah rah ha ka um kaba jur ryngkat bad u para jong u uba 27 snem, u Pradip, bad uwei u paralok, u Janak.
Kine lai ngut ki briew ki la mareh ban leit sha ka jaka kaba shngaiñ hadien ba la maham ïa ki ba ka jingshlei um ka la jan poi. Hynrei ka um jur bha ka la wan hadien khyndiat por bad rong noh ïa u Pradip bad u Janak. U Neupane u la lait im hadien ba u la mareh shaneng sha ki jaka ba long lum.
Hadien ar sngi ha ka jingsngewlem, u Neupane u la leit biang ban ïarap ha ki kam jingïarap, namar ki briew kiba la hap ban mih noh na ki ïing ki donkam bam bad jaka sah, katba ka kynhun sorkar ka kynduh ïa ka jingduna ki kynhun ai jingiarap.
“Ka jinglait im jong nga ka long tang da ka nusib. Katba nga dang im, ngan bteng ban shakri ïa ka imlang sahlang bad ïa ki briew,” u la ong.
Ha ka shnong Nuwakot kaba don marjan, u Suchit Joshi u la bteng ban ïarap ha ki kam wad bad pyllait im, katba saw ngut ki dkhot ka longïing jong u ba kynthup ïa ka tnga jong u, ka khun kynthei kaba hynñiew snem, ka para kynsi jong u bad u pyrsa jong u, ki dang jah.
Ha kawei ka jingwad, u Joshi u la shem ïa u kñi jong u bad uwei pat u pyrsa. Hadien kata, ka jingwad jong u ka la kylla long ka kam pyllait im kaba kham heh, ha kaba san ngut ki briew ki la ïasnoh lang bad ka kynhun jong u.
Ka kynhun ka la ïarap ïa ki briew kiba la sahkut ha ka jingshlei um bad pyllait im ïa kawei ka riew tymmen kaba la sahkut ha ka jingshleium hakhmat ka ïing jong ka, bad ki la ïalam ïa ka sha ka jaka kaba shngaiñ.
U Joshi u la bteng ban wad ïa ki bahaiing jong u, kynthup ruh ryngkat bad ki bor pahara. Ha kawei ka jingleit wad, la shem ïa lai tylli ki met ïap briew na ka wah Trishuli, hynrei ki met ki la julor bha bad ym lah shuh ban ithuh.
Watla u dang wad ïa ki baieit ba thoin jong u, u Joshi u la bteng ban ïarap ïa kiwei kiba shah ktah ha kane ka jingjia. “Nga pang ka mynsiem, hynrei nga dang bteng ban trei ha ki kam pyllait pynim,” u la ong.