Saw tylli ki Jylla yn leit jngoh u Vice President ka Ri naduh 6 tarik, kynthuplang ka Meghalaya

New Delhi, Nailur 06 : U Vice President ka Ri u CP Radhakrishnan un leit jngoh ïa saw tylli ki jylla shatei-lam-mihngi kynthup lang ïa ka Meghalaya naduh ka 06 tarik haduh ka 09 tarik Nailur.
Ha kane ka jingleit jong u, un ïashim bynta ha ki prokram kiba ïadei bad ka kolshor, ka pule puthi bad ki jingïalang paidbah. Un leit ruh jngoh ïa ki jaka kiba kongsan ha ka histori bad ha ka imlang sahlang.
Ha ka 06 tarik Nailur, u Radhakrishnan un poi ha nongbah Guwahati ban ïashim bynta ha ka jingrakhe ïa ka Golden Jubilee jong ka Geetanagar College, kaba mynshwa la tip kum ka Kanya Mahavidyalaya.
Hadien kata, un ïashim bynta ha ka jingïalang jong ka Srimanta Sankaradeva University of Health Sciences.
Ha ka 07 tarik Nailur, u Vice President un ïashim bynta ha ka prokram buh mawnongrim ha Gauhati University. Hadien kata, un ïakren bad ki samla pule, ki nonghikai bad ki riewpawkhmat ha ka Convention Centre jong ka skulbah.
Hadien kane, un wan sha Shillong, ha kaba un ïashim bynta ha ka jingïalang pdiang burom bad ka prokram pyni kolshor ha Soso Tham Auditorium.
Ha ka 08 tarik Nailur, u Radhakrishnan un leit sha Imphal. Hangtei un leit jngoh ïa ka INA Museum bad War Memorial ha Moirang, bad ïa ka Sainik School.
Ha ka 09 tarik Nailur, un leit sha Itanagar ban ïashim bynta ha ka jingïalang kyrpang jong ka Arunachal Pradesh Legislative Assembly. Un leit ruh jngoh ïa ka Assembly Gallery-cum-Museum.
Nalor kata, un jngoh ïa ka Nyedar Namlo, ka Jawaharlal Nehru State Museum ha Itanagar, bad ka Donyi Polo Mission School, kaba ai jinghikai ïa ki khynnah kiba duna ka jingïohi bad kiba duna ka jingïohsngew.