Hadien 10 sngi la lap ïa ka longkmie ba shah rong ha ka umsaw, sahkut ha jrong ka ïingsaw mala

Nuwakot (Nepal), Nailur 06 : Kawei ka longkmie ba la 60 snem ka la lait im da ka bok hadien ba la lap ïa ka ba ka sah kut haduh 10 sngi ha ka mala kaba hajrong duh jong ka iing kaba don saw mala, kata ruh hapdeng ka ktieh kaba rben bad kaba dap da ki lyngkhot lyngkhai hadien ka jingshlei um kaba jur kaba la jia ha ka nongbah Bidur kaba don ha Nuwakot district jong ka Nepal, ong ka khubor sorkar.
Ha ka video kaba ki pulit ka Nepal ki pyllait paidbah la pyni ba ki nongpynim ki dang tih lyngba ka ktieh bad ka jaboh jabaiin, shuwa ba kin ïoh pyllait im ïa kane ka longkmie, kaba la tip kyrteng kum ka Chandika Shrestha, lyngba ka jingkhangiit ha ka bynta ba halor jong ka iing jong ka.
Ïa kane ka longkmie la lap ba ka la thiah khlem tip briew. La ong ruh ba kham hadien ka la sdang ban tip briew biang bad na ka liang ki kynhun pyllait im ki la pynkup syaid ïa ka shwa ban ïalam noh ïa ka na katei ka jaka.
Hadien ba dep pyllait im ïa ka da ka kynhun Armed Police Force (APF) kaba don 9 ngut, la kit ïa ka Shrestha da ka helicopter sha Maithili Barracks jong ka Nepali Army ha Trishuli na ka bynta ka jingsumar kaba nyngkong.
“La pynkit noh ïa ka sha Kathmandu na ka bynta ka jingsumar”, la ong u nongai ktien ka APF u Shailendra Thapa.
Ka jingshlei um kaba jur, kaba la sdang na ka daw jong ka jingum ki lum thah hajan u pud Nepal-Tibet ha ka 26 tarik Nailur, ka la pynjot ïa ki shnong bad ki shnong rit ha ka bynta ba shatei bad pdeng jong Nepal, ha kaba palat 1,300 ngut ki la ïap, katba kumba 5,000 ngut ki dang jah.
Ka wah Bhotekoshi, kaba tuid sha shathie na ki ranab khappud Himalaya, ka la kit ïa ka um bah sha ki bynta ba shapoh, da kaba rong noh ïa ki iing, ki kali, ki surok bad ki jingkieng bad pynjulor ruh ïa ki projek bording, katba ka jingshlei ka la pur sha bun tylli ki distrik.
Tad haduh mynta, ki kynhun pyllait im ki la ïoh ban pyllait im haduh palat 13,000 ngut ki briew.