Mih jingïakajia ha Langpih ba wanthoh khanasamari ki briew ka Assam bad ïeng pyrshah ki nong Meghalaya

Shillong , Nailur 05 : Ka jingïakajia kala mih biang ha Langpih, West Khasi Hills hadien ka jingleit khang ki paidbah nong Meghalaya, ïa ka jingthoh khana samari ha skul Noapara LP ha Langpih.
Ka kynhun ki paidbah na Meghalaya ba la synran da ki Pulit ka Meghalaya, ki la leit ban pyrshah ïa kane ka jinglum khana samari, kaba la pynmih biang ïa ka huri hura ha kane ka jaka khappud kaba don hapdeng ka jingïakajia.
Kat kum ka khubor ba ïoh, u ki Rangbah Shnong Chankiya Marak bad Arthuch Sangma ha ryngkat ki Pulit ka Meghalaya, ki la leit rung ha kane ka skul ban khang ïa ki Nongtrei ka Sorkar Assam kiba dang pynrung kyrteng ïa ki nongshong shnong.
Ka jingïania kaba jur ka la mih ha kane ka skul, kaba la pynlong ïa ki Pulit ka Assam ban hiar mardor bad ban tuklar. ïa kine ki nonglum khana samari la synran noh sha ki jaka ba shngaiñ hadien ba ki la pyndep ïa ka kam ba la bynshet ha ki.
Kane ka jingjia sa shisien ka la pyni ïa ka jingsynjor ka suk ka saiñ ha kane ka jaka khappud ka Assam-Meghalaya bad ki nongshong shnong ki la pynpaw ïa ka jingsngewkhia halor ka jingïai mih ki jingjia ïapyni bor ha ka thaiñ.
U Arjun Chhetri, Executive Member ka Rabha Hajong Autnomous Council, ula kynnoh ba kum kine ki jingjia kila jia na ka por sha ka por namar ka jingduna palat ka jingtuklar jong ki bor synshar bad ka jingbym biang ki rukom ai pahara.
Haba kynthoh ïa ka jingkam trai ïa ka jaka, u Chhetri ula ong “Lada ki shnong Khasi-Garo ki don ha Dispur, hato ka Meghalaya kan kam ïa ka nongbah ka Assam?. Ula kynnoh ba kane ka jingkam ban kam trai ïa ka jaka kan wanrah ïa ka jingïakajia kaba jur ha kane ka jaka khappud.