Nongpoh, Nailur 06 : Ka Nartap FC ka la khur ïa ka nam lahduh jong ka 1st U-17 Knockout Football Tournament, kaba la pynlong da ka Mawtnum Socio & Cultural Sports Club, hadien ba ka la pynliem ïa ka Last King FC lyngba ka jingïashut Tie-Breaker ha ka jingïakhun final kaba la long ha madan ïalehkai ka shnong Mawtnum.
Ka jingïakhun final ka la long kaba itynnad bad kaba ïakhaid bha, ha kaba baroh ar tylli ki kynhun ki la ïaleh shitom ban pynkhih jar. Hynrei watla ka jingïakhun ka la ïaid baroh 90 minit, ym shym la don satia kano kano ka kynhun kaba lah ban thep kol, kaba pynlong ïa ki bor pynïaid ban pynïakhun da ka tie-breaker.
Ha ka jingïashut tie-breaker, ka Nartap FC ka la lah ban pynliem ïa ka Last King FC, bad da kane ka jingjop ka la rah ïa ka nam lahduh ryngkat bad ka trophy bad ka song pisa kaba T.20,000/-. Katba ka Last King FC, kaba wan ha ka kyrdan ba-ar, ka la ïoh pdiang ïa ka song pisa kaba T.10,000/-.
Ïa ka lympung la pynhap pyrda noh da u Bah Ransom Sutnga, uba dei u riew rangbah na Ri-Bhoi uba la paw bha ha ki kam imlang-sahlang bad ki kam lehisynei. Ha kane ka sngi la donlang ruh u Bah Rangkynsai Makdoh, Bah B.B. Nongkling President ka Mawtnum Socio & Cultural Sports Club, ryngkat bad kiwei ki nongpynïaid bad nongkyrshan.
Naka liang ki nongpynïaid ki la sam ïa ki khusnam sha ki kynhun bad ki nongjop, ryngkat bad ki khusnam shimet sha ki nongïalehkai ha kane ka jingïakhun phainal.
