La rakhe ïa ka Republic Day ha Khliehriat ha ka rukom ba shongkun

Khliehriat, K’Lyngkot 27: Ha ryngkat lang bad ka ri India hi baroh kawei, ha Khliehriat East Jaiñtia Hills District ruh myn ha ka 26 tarik u Kylla lyngkot 2025 la rakhe ïa ka 76th Republic Day bad u myntri ka sorkar jylla, uba dei ruh u MLA ka thaiñ u, u bah Kyrmen Shylla u la wan ban pynher ïa ka lama lai rong jong ka ri India bad shim ïa ka Rashtriya Salute parade jong ki 9 tylli ki kynhun ba kynthup ka kynun na ka tnat District Police, Civil Defence &Home Guards bad jong ki khynnah skul.
Ïa ka prokram jong ka Republic Day la pynlong ha madan jong ka Khliehriat Higher Secondary School Playground.
Hadien ka parade la ïoh ruh ïa ka jingpyni ïa ki tableau kiba na ki tnat treikam jong ka sorkar kiba la pyni ruh ha ka rukom ki tableau ïa ki jait skim bapher bapher, la ïoh ruh ïa ki jingshad tynrai na ki khynnah skul kiba na ki skul bapher bapher, ha kane ka prokram la ïohi ïa ka jingwan shimbynta lang ki tnat sorkar ba kynthup ruh ki heh sorkar, ki khynnah skul kynthup lang ki nonghikai bad ki riew paidbah kiba na ki shnong bapher bapher kiba na East Jaiñtia Hills District.
Ha kane ka sngi ba rakhe ïa ka Republic Day la sam ruh ïa ki prize sha ki kynhun kiba jop ha ka March Past Competition ha kaba ka skul JNV Rymbai ( shynrang) ka la rah ïa ka nam lahduh bad ka skul Ambrose Memorial Secondary School, ka la wan ba ar .
La sam ruh ïa ki prize sha kito kiba jop ha ki jingiakop bapher bapher.
Sngewtynnad ban tip ruh ba ka Dorbar Shnong Tuber Kmai Shnong ka la rah ïa ka nam lahduh ha ka jingshad tynrai, ka skul KB Memorial Secondary School, Wapung ka la ïoh ha ka kyrdan ba ar bad ka Biate Cultural Troupe ka la wan ba lai.
Ha kaba iadei pat bad ka jingpyni ïa ki tableau ka tnat District Horticulture bad Agriculture Office, East Jaiñtia Hills District la ïoh ïa ka nam lahduh ha kaba na ka liang ka tnat District Horticulture ka la pyni tableau ïa ka buit pyniap khnai lane ka Dung Bilor Rodent Bait ba la lap buit da u District Horticulture Officer East Jaiñtia Hills District, u bah Deibor Dhar.
Ka tnat District Commerce & Industries Centre (DCIC), Khliehriat ka la ïoh ha ka kyrdan kaba ar ha ka tableau bad ka tnat Soil & Water Conservation Department ka la long ba lai, ha kane ka sngi la sam ruh ïa ki jing ai sngewbha sha ka Shelter Homes kaba don ha Khliehriat bad ka 7Tyndai Child Care Counselling Centre, Tuber Kmaishnong.