Khliehriat, Ïaïong 18: Ïa ka sngi “National Deworming Day (NDD), 2023” la rakhe hynin ka sngi ha ka jingïalang kaba la long hapoh Khliehriat Higher Secondary School, East Jaiñtia Hills District, Khliehriat.
Ia kane ka prokram la khot pynlong da ka ophis jong ka District Medical and Health Officer, East Jaiñtia Hills District, Khliehriat da ka jingthmu ban pynioh dawai wieh na ka bynta baroh ki khynnah skul kiba hapdeng ka rta 1snem haduh 19 snem rta lyngba ki rynsan bala shim lyngba ki skul bad ki Anganwadi Centre.
Na ka liang Dr. (Mrs) N.P. Suchiang, DIO, I/C East Jaiñtia Hills District, Khliehriat ha ka jingkren ka la pyntip hapdeng ki khynnah kiba la wan ïashim bynta ha ka prokram ba la sdang pyntreikam ïa ka ‘National Deworming Day (NDD)’da ka tnat ka koit ka khiah jong ka sorkar India ha ka snem 2015, bad la ju pynlong ïa kane ka prokram arsien shi snem ha u bnai Ïaïong bad u bnai Risaw ban pynthikna ba iwei pat uwei u/ka khynnah ha India kin lait na ka jingdon wieh.
Nalor kata ka la pynshai ruh kumno ba kine ki wieh ki ïoh ban ha ka met jong ngi ki briew, ki dak ki shin bad ki dak jingshitom kiba paw, bad ka la ban ruh halor ka jingdonkam ban bud ryntih ïa ka jinglehkhuid khnang ban lah ban khanglad ïa ka jingshah ktah na ka jingboi wieh.
“U dawai Albendazole u dei uba shngaiñ na ka bynta ban tehlakam ha kaba ïadei bad ka jingdon wieh ïa uba lah ban shu dih ha rynkat bad ka um,” ong ka Dr Suchiang bad aijingmut ruh ïa ki khynnah skul kiba hapdeng ka rta naduh 1 haduh 19 snem rta ba kin dih ïa une u dawai kuli.
Na ka liang ka DIO, I/C East Jaiñtia Hills District, Khliehriat ka la pyntip ruh ba ka jingrakhe ïa ka ‘National Deworming Day (NDD)’ yn pynbud lyngba ka jingai dawai paidbah ha ka 21 tarik mynta u bnai da ka jingthmu ban pyllait ïa ki khunlung khynnah na ka jingdon wieh, kata na ka bynta kito ki bym shym la ïoh lad ban ïashim bynta ha ka jingai dawai kaba la long hynne ka sngi.
Kiwei kiwei pat kiba la ai jingkren ha kane ka prokram ki kynthupia u bah Ariston Dhar, District Programme Manager, NHM, East Jaiñtia Hills District.
