Nongpoh, Naiwieng 10: U Deputy Commissioner ka Ri-Bhoi District u Arpit Upadhyay mynta ka sngi u la pynlait paidbah ïaki kyrteng jong ki nongthep vote (Draft Electoral Roll) jong ki 5 tylli ki Assembly Constituency ha Ri-Bhoi District ba kynthup ïaka 8-Mawhati. 9-Nongpoh, 10-Jirang, 11-Umsning bad 12-Umroi bala aiti ruh sha ki seng saiñ Hima bapher bapher ha Ri-Bhoi haka jingïalang kaba la long ha Conference Hall jong ka ophis ka Deputy Commissioner.
Ha katei ka sngi ka jingpynlait ïa ka Draft Publication jong ka Electoral Roll ha Ri-Bhoi la don ryngkat da u Bah T.Lyngwa Electoral Roll Observer, Kong B.K Ranee, MCS, ADC cum Electoral Registration Officer, Bah R.Kharbihkhiew, ADC, ERO, Bah W.R Massar, EAC, Bah E.K Dkhar EAC bad ki nongmihkhmat naki seng saiñ pyrthei bapher bapher ha Ri-Bhoi.
Haba kren ha katei ka sngi naka liang u Arpit Upadhay DC ba dei ruh u District Election Officer ka Ri-Bhoi District u la ong ba ka EPIC ka long kaba donkam ban pynshisha ruh ba ki paidbah ki dei ki nongshong shnong ba pura jong ka Ri India hadien ba kila ioh ka hok ban thep vote bad ban jied ïaki nongmihkhmat bad ka jingthmu jong katei ka Special Summary Revision jong ki Electoral Rolls ka long ba kino kino ki nongshong shnong kiba la kot ïaka 18 snem ka rta kim dei ban shah ieh bad ba kidei ban pynrung kyrteng ïalade kumba kadei ka hok jong ki.
U la kyrpad ruh ïa baroh ki paitbah khamtam kito ki ban sa dap 18 snem ka rta ha ka 01-01-2023 ban pynrung kyrteng ha ka Electoral Roll, bad ha katei ka sngi la ioh ruh ban aiti ïaki Draft Photo Electoral Roll sha ki nongmihkhmat jong ki seng saiñ Hima bapher bapher.
