Nongpoh, Naiwieng 10: Ka Trauma Centre kaba don ha Nongpoh Civil Hospital haduh mynta ka dang ieng kynjreng khlem pat lah ban pyrulong kumba la thmu da ka sorkar jylla.
Kane ka Trauma Centre ka dei kaba la trei da ka sorkar jylla bad ba lah ban pyndep mynta la bun phew snem bad kaei kaba la iohi ne lap ka dei ka jingbym pat lah ka sorkar ban pyndep ïa ka jingkular na ka bynta ban plie ne pyntreikam noh ïa kane ka jaka ai jingumar kumba ka dei ban long ne mang kyrpang da ka sorkar.
Haba kren halor kane ka Trauma Centre kaba don ha Civil Hospital Nongpoh, lada lah ban pyntreikam kan long shisha ka jingmyntoi na ka bynta ki paidbah ka Ri Bhoi District bad wat ha ka jylla hi baroh kawei. Ka daw ka long ba ka Nongpoh ka dei ka Head Quarter jong ka District bad ka surokbah National Highway-6 ruh ka dei ka surok kaba pynïasoh ïa bun tylli ki jylla ba ki nongleit nongwan ki ïaid lyngba kane ka surok bad teng teng pat lada don ka jingjia ba sgnewsih kum ka jingkylla kali ba don kiba mynsaw la hap rah sha Shillong ne Guwhati na ka daw ka jingbym biang ki tiar ki tar ne ki jingsumar.
Haba buddien halor kane ka Trauma Centre, dang ha u snem 2020 ba don don ïakhun ïa ka khlam COVID-19 ka la don ka jingkular na ka sorkar jylla ba dei ban plie bad pyntreikam noh ïa kane ka trauma centre bad phewse haduh mynta ka jingangnud ki paidbah kam pat shym la ulrong ha kaba kane ka Trauma Centre ka dang sahkut tang ka jingtei khlem da lah pat ban pyntreikam kum kata ka jaka ai jingsumar ba la tip ha ka ktien Nongwei, ‘Trauma Centre’.
Halor kane ka jingthmu ban plie noh ïa katei ka Trauma Centre kaba dei naduh u snem 2020, ka dei ruh hadien ba la pyntip ha u snem 2020 da u MLA ka Nongpoh, u Bah Mayral Born Syiem ba u la dep ban phah jingthoh bad ïa kren naduh u Myntri ka tnad ka koit ka khiah bad ruh sha u Myntri rangbah kiba la kular ban plie noh ïa katei ka Trauma Centre.
Kumba la ïathuh ruh da u Bah Mayral Bron Syiem ha u snem 2020, la pynpaw ruh namar ka jingdon ka khlam COVID-19 la pynsangeh shuwa ban plie paidbah noh ïa katei ka Trauma Centre ban yn plie noh kham hadien bad kata ka jingthmu ban plie noh ïa kane ka Trauma Centre haduh kine ki sngi kam pat shym la urlong bad katei ka jingtei ka dang sahkut khongreng ba la pyndonkam noh kum ka ophis u District Medical & Health Officer ka Ri Bhoi.
Kum ban kdew, ka Trauma centre ka la donkam ban treikam noh ha Ri Bhoi ha kaba la don ka jingjia ba sgewsih kum ka jingmynsaw kaba ktah na ka jingkylla kali, ka jingkhiie u jumai, ka eriong bad kiwei kiwei ki jingjia ba jia kynsan, ha kaba lada don katei ka Trauma Centre kan ïarap shibun ban ioh ka jingsumar haba don kiba mynsaw ne kiba shitom.
