Pynlong prokram sam dawai bad Legal Awareness prokram ka ophis DLSA Khliehriat ha shnong Narwan

Khliehriat Naiwieng 10: Ka ophis District Legal Service Authority (DLSA) East Jaiñtia Hills District, ha ryngkat ka jingïatreilang bad ka ophis jong u Deputy Commissioner, hynnin ka sngi ka la pynlong ïa ka prokram sam dawai ei sha ki paidbah nongshong-shnong jong ka shnong Narwan, East Jaiñtia Hills District bad ha kajuh ka por ka la ïoh ruh ban pynlong ïa ka prokram ai jingpynshai sha ki paidbah ha kino kino ki kam kiba ïadei bad ka aiñ bad kane ka long ruh kum ka jingpynkup bor ïa ki nongshongshnong kiba katkum ka aiñ, ïa ka prokram la pynlong ha Madan Mooknor ha shnong Narwan.
Ka District and Sessions Judge cum Chairperson District Legal Services Authority (DLSA), East Jaiñtia Hills District, ka kong C.Dkhar ka la ai ka jingkhublei ïa baroh ki tnat bapher bapher kiba don hapoh ka district kiba la ïa wan ban ïa shim bynta lang ha kane ka prokram ka ba long ka jingmyntoi ïa ki paidbah, ka la ong ruh ba kane ka Pan India Awareness cum Outreach Campaign ba la pynlong da ka ophis DLSA ka dei ruh ka National Legal Services Authority (NALSA) bad hapoh kane ka district, ar tylli ki prokram la dep pynlong, kata ka prokram ba pynkupbor ïa ki nongshongshnong (Empowerment of Citizens through Legal Awareness) bad ka Outreach and Haq Hamara Bhi To Hai.
Ha kane ka sngi, ka kong C.Dkhar, ka la pynsngew ruh ba ka kam ka kaba kongsan jong ka ophis District Legal Service Authority ka dei ban ai ka jingshakri ïa kito kiba duk ba kyrduh kiba ha ka imlang sahlang ka ba ym donkam satia ban siew pisa, khnang ban wanrah ïa ka bibishar kaba hok bad kaba khuid kaba dei shisha katkum ka aiñ, nalor kata ka la ong ruh ba ka tnat DLSA kan ïai peit bniah ha kaba ïadei bad ka jingpyntreikam ïa ki skim sorkar bapher bapher ba pyntrei da ki tnat bapher bapher, khnang ba kan wanrah jingmyntoi ïa kito kiba dei hok shisha ban ïoh ïa ki jingmyntoi.
U Block Development Officer (BDO), jong ka Saipung C&RD Block, u Dr. R. Pyrtuh, u la ai ki jingpysnhai kiba bniah ha kaba ïadei bad ki jait skim bapher bapher kiba la pynrei da ka C&RD Block Saipung kiba kynthup ka skim MGNREGA, Pradhan Mantri Awas Yojana Gramin (PMAY-G), Members of Parliament Local Area Development Scheme (MPLADS) Special Rural Works Programme (SRWP), National Social Assistance Programme (NSAP), Chief Minister Special Development Fund bad ka Social Security Benefit Schemes.
Utei u BDO, u la kyntu ruh ïa ki paidbah jong ka Saipung C&RD Block ba kin wan mih sha ophis khnang ba kin dup ïoh shibun ki jingtip shaphang ki skim, ha kajuh ka por u la pynshlur bad ai mynsien ïa ki nong ïoh jingmyntoi ba ki dei ban register noh ïalade bad ka e-SHRAM bad kumjuh ruh ban pynrung kyrteng ha u Aadhaar card.
U Addl. Superintendent of Police, East Jaiñtia Hills District, u bah B.Jyrwa, MPS, ha ka jingkren ba lyngkot u la ai ka jingpynshai ha kaba ïadei bad ki kyndon aiñ jong ka NDPS Act, u District Child Development Officer, East Jaiñtia Hills District, u bah T. Kyndiah, u la kren bad ai jingpynshai halor ki aiñ kiba ïadei bad ka shongkha khynnah bad ki hok jong ki khynnah, ka Panel Lawyer, ka kong A. M. Nongtdu bad ka kong D. Lyngdoh, ki la kren halor ki jingeh kiba ju mih na ki longiïng longsem (Domestic Violence), ki aiñ jong ka POCSO, ka kong P.Dkhar ka la kren halor ki aiñ kiba ïadei bad kito kiba don jingduna ha ki dkhot met bad ki hok jong ki tymmen.
Ki tnat sorkar, kiba la ïa wan ban ïa shim bynta lang ha kane ka prokram ki kynthup ka ophis jong ka District Agriculture Officer, East Jaiñtia Hills District, ka ophis jong u District Medical and Health Officer, East Jaiñtia Hills District, ka tnat Labour bad ka ophis jong u Deputy Commissioner (Supply), East Jaiñtia Hills District.
Ha kane ka prokram, ka District and Sessions Judge cum Chairperson District Legal Services Authority (DLSA), ka kong C. Dkha ka la aiti ïa ka Work Orders sha ki lai ngut ki nong ïoh jingmyntoi kiba na ka skim PMAY-G Scheme bad ka Chief Judicial Magistrate cum Secretary of District Legal Services Authority (DLSA), East Jaiñtia Hills District, ka N.M. Momin, ka la aiti ïa ka work order jong ka skim MGNREGA sha ki bor shnong jong ka shnong Sahkai.
Ha kane ka Camp, la ïoh ruh ban pynlong ïa ka jingpynrung kyrteng Aadhaar, ban register kyrteng ha e- SHRAM bad haduh 192 ngut ki nongshong shnong ki la ïoh jingmyntoi na ka jingsam dawai ei lane ka Free Medical Checkup ba la pynïaid da ka ophis jong u District Medical & Health Officer, East Jaiñtia Hills District.