Jowai, Lber 10: Ka ïing Dorbar jong ka Jaiñtia Hills Autonomous District Council (JHADC) mynta ka sngi thohdieng kala mynjur ban pynkylla ïa ka aiñ jong ka JHADC (Training by Non Tribal First Amendment) Rules, Bills 2023.
Ïa ka jingpynkylla thymmai ïa kane ka Jaiñtia Hills Autonomous District (Training by Non Tribal) Rule, 2015 la leh katkum ka No.JHADC/TAX/TNT/6/2007/6 bad kane ka ain kan treikam hapoh u pud u sam jong ka JHADC baroh kawei.
Haba ïatai sani hapoh ka ïing Dorbar la pynpaw ba kane ka aiñ kan ïarap shibun ïa ka Council ha ka ban tynrong ïa ka jinglum khajan na ki nongwan seng kam kiba nabar ka Jylla shapoh ka District, da kaba kin hap ban siew ïa kane ka khajna katkum ba la mang ne buh dor da ka Council.
Kane ka aiñ kan kynthup ïa ka khajna naduh ki Dukan Groceries, Hardware, Furniture, nongdie tiar light, Readymade garments, dukan sha, ki dukan die shaka (tyres), ka khajna ïa ki kali kamai, ki nongtrei Constructions Class-I, II, III, IV category, ki nongsupply mar, ki jaka bam bad jaka sah, ki dukan Dry Cleaning and laundry, dukan suh jaiñ, ki nongtrei bylla sngi, ki nongkhaïi mar (export), ki dukan die mobile nalor kiwei de.
