Ingkhong san tylli ki dukan hapoh ka Ïew shnong Dombah, Sakwang, julor da ki phew lak tyngka
Mawkyrwat, Lber 10: Kawei ka jingjia kaba la jia hynnin ka shiteng miet jong ka 9 tarik u Lber, 2023 ha kaba ka ding kaba klang ka la bam duh ïa ki 5 tylli ki dukan kiba don ha Ïew shnong Dombah, Sakwang, South West Khasi Hills District.
Katkum ka jingïoh lum jingtip ba ka jingjia ka dei ha ki por kumba 12 baje ei ei shiteng miet bad ka jingsdang ban klang jong ka ding ka dei na ka phang mihngi. “Haduh mynta ym pat lah ban batai ba ka dei na kano ka daw ba kine ki 5 tylli ki dukan ki pluh”, ong ka tyllong khubor na ki trai dukan.
Ki dukan kiba la shah ktah ha kane ka jingbam duh jong ka ding ki long ka dukan jong ka Bonlina Kharjahrin dukan marbam, ka Drip Wartde dukan marbam, kong Biak Wartde dukan sha, kong Di-ioris Ramsiej dukan sha, bad jong ka kong Ridalin Lyngkhoi dukan taiñ.
Lah ban kdew ha ki jingduh nong jong ki trai dukan na kane ka jingshah bam duh ha ka ding la shu antad ba ka poi haduh da ki 10 lak tyngka ei ei.
Haba ïoh ban ïa kren bad ki trai dukan ki la pynpaw ba ka jingshah bam duh jong ki dukan jong ki la long shisha ka jingduhnong kaba khraw namar ma ki ki ju im ban kamai jakpoh na kaba shong ha kine ki dukan, hynrei ym lah ban sngewthuh kaei kaba la jia ba ka jingdum ka la wan kah ha kaba ka ding kaba klang hynnin ka miet jong ka 9 tarik mynta u bnai ka la klang bad bam duh syndon ïa ki dukan jong ki bad ingkhong lut ki tiar ki tar.
Kumta ki la buh ka jingkyrpad ïa ki bor sorkar ba ki dei ban thaw lad lem da kano ka lynti ba ki lah ban leh khnang ba ma ki kin nym don ha ka jingkyrduh bad kumjuh ruh khnang ba kin lah ban shna biang da kiwei pat ki dukan ba kin ïoh ban kamai japoh ban pyndap pynbiang ïa ki jingdonkam ha ïing ha sem.
Katba ha ka jingkren jong u bah S. Kharjahrin, Myntri Shnong Sakwang pat ula ïathuh ba halor kane ka jingjia u la ïoh jingtip ha ki por 12:52 shiteng miet bad mar mar hi u la ai jingtip noh hapoh Fire Service, Shillong bad ma ki ruh ki khlem pynslem ki la ai jingtip hapoh Fire Service, Mawkyrwat khnang ba kin lah ban wan pynlip ïa ka ding ha ka por kaba biang. “Kine ki ïing kiba la shah bam duh kim dei ki ïing ba sah briew hynrei ki dei ki dukan ba ki ju pyndonkam ban die jingdie ha ki por mynsngi”, ong u Myntri shnong bad halor kane ka jingjia ruh ym shym la don mano mano ba mynsaw.