Dang pynïar ka Seng HITO ïa u tnum u tyndai ban bteng ka jingshakri ïa ki paidbah ha Ri Bhoi

Nongpoh, Lber 10: Ka Seng Hynñiewtrep Integrated Territorial Organization (HITO) kum ka shnat treikam ha Ri Bhoi ha ka sngi Palei jong ka taiew ka la lah ban pynïar sa ïa ki ar tylli ki shnat treikam ha Ri Bhoi District ban pynskhem ïa ki nongïalam ki ban kit ban bah ïa ki kam jong ka seng na ka bynta ban shakti ki paidbah ka dong bad ka thaiñ ha Ri Bhoi District.
Kine ki ar tylli ki shnat treikam bad ba la pynskhem ïa ki nongïalam ki kynthup ïa ka snat treikam ba la tip kum ka Umden Area bad Umïam Area, ha kaba la wan ban pynshkhem ïa ki nongïalam da u President ka HITO Ri Bhoi District, u Bah Ban Kharnaior ryngkat ka jingdon lang kiwei kiwei ki nongïalam na ka District.
Ki nongïalam ka Umden Area ki kynthup ïa u President ba la jied ïa u Bah Lostar Lyngdoh, Ramlin Marbaniang, General Secretary, lem bad kiwei kiwei ki dkhot nongïalam. Ki nongïalam ka Umïam Circle pat ki kynthup ïa u President ba la jied ïa u Bah Garry Lyndem kum u President, vice President, Noco Nongpluh, General Secretary, Richard Nongbri, Organizing Secretary, Arkypoul Thongni, Publicity Secretary, Nikhil Mawlong, Finance Secretary, Novin Nongpluh lem bad kiwei kiwei ki nongïalam.
Ïa kine ki nongïalam jong kine ki ar tylli ki shnat treikam la wan ban pynskhem bad pynbam smai da u President ka HITO Ri Bhoi District, u Bah Ban Kharnaior.
Na ka liang u Bah Ban Kharnaior, ha kane ka sngi, u la ai ruh ki kyntien ki sneng ki kyntien kraw ïa ki nongïalam jong kine ki ar tylli ki shnat treikam bad kum u nongïalam u la kyntu ruh ïa ki ba kin shim ïa kata ka jingkitkhlieh na ka bynta ban ai ka jingshakri kaba bha tam ïa ki paidbah katei ka dong bad ka thain ha ki ar tylli ki shnat treikam.