Jowai, Nailar 07: Ka Lehñiam Behdeiñkhlam ba shi sen shisnem jong ka Seiñ Raij Ïalong kala poi noh sha kaba kut mynta ka sngi, ha ka jingiphuh ipheing bala wan ban ïashim bynta da ki khun ka ka Sieñ raij bad ki dong bapher bapher.
Ïa ki rot bala wamrah mynta ka sngi kila don haduh 12 tylli bad hadien ka jingshad ha ryngkat ka kmen ka risa ka pum ka tem ïa ka tangmuri ka bom, la leit noh ïa ki rot ha ka jaka ba la khot ka Tre-Pyrda (Aitnar), kane ka shad naim Behdeiñklam ki khun ka Seiñ Raij Ïalong kila ïoh biang ïa ka lad ban ïashim bynta hadien ar snem na ka jingwan lyngshop ka khlam Covid-19.
Haba phai sha ka jinglehñiam kala long kaba ïaid beit ïaid ryntih naduh kaba sdang bad mynta ka sngi lawan sakhi lang da u kongsan uba ruh u myntri sorkar jong ka tnad transports ka jylla ma dasakhiatbha lamare, ha ryngkat ka jingdonlang u MLA ka Jowai ma Wailadmiki Shylla, ma Shitlang Pale MLA, u Daloi ka Elaka Jowai ma Puramon Kynjing, ma Ngaitlang Dhar, ma Lakhon Biam MDC, ma A.A. Shillai MDC, ki Waheh Wasan bad kiwei de kiba la shah khot sngewbha.
Naka liang u kongsan ma Dasakhiat haba ai jingkren ha kane ka sngi ula ai ki kyntien kyrkhu kyrdoh ïa ki nong pynïaid ka Seiñ Raij Ialong kiba la trei shitom ban pynïaid beit pynïaid ryntih ïa kane ka lehniam Behdeiñkhlam bad u kyrmen skhem lyngba ka jingpyndep ïa kane ka lehñiam kan wanrah ïa ka bha ka miat, ka roi ka par ha baroh ki liang.
La ïathuh ba ki dong bapher bapher ba kynthup na ka Seiñ Raij na Wahiajer, Ïalong bad na Nongkhyllem kila wan ban ïashim bynta ha kane ka lehñiam Behdeiñkhlam.
