Nongstoiñ, Nailar 17: Ka Siejlieh Sport Social & Cultural Youth Organisation ha ka sngi hat majai, ka la ïoh ban pynkut noh ïa ka jingrakhe lehkmen jubili rupa ka jingkynjoh sha u Mawmer ba 25 snem jong ka club.
Ha kane ka sngi u bah Gabriel Wahlang MLA bad MDC ka Nongstoiñ konstitwensi u la long kum u kongsan ryngkat ka jingïasynranlang u bah H.R.Thabah, uwei na ki riew shimet u ba la ju noh synñiang lem ïa ka Club bad ïa ka shnong hi baroh kawei, u ba la long ruh kum u symbud kongsan ha katei ka sngi leh kmen bad u ba la shim ruh ïa ka bynta ban pynhap lama ïa katei ka jubili.
Ha katei ka sngi la ïadonlang ruh u bah P.B.H. Tympuiñ sordar shnong Siejlieh, u Samla Deborland Kharsyntiew secretary ka shnong Siejlieh, u samla Bendrowell Hashah Secretary ka Siejlieh Sport Socïal & Cultural Youth Organisation bad kiwei kiwei ki riew rangbah jong ka shnong.
La ong ba ka shnong lyngba ka Club ka la ïoh ban rakhe ïa katei ka jubili rupa la shi snem lynter lyngba ki jingïalehkai bapher bapher, kynthup naduh ki Carrom board, Badminton, Arms Wrestling, Drawing Competition, Archery, Basketball, Volleyball, Cricket, Kabadi, Marathon, Pillow fight, Mawpoiñ, Football, Talent Show bad kiwei kiwei.
Lyngba kitei ki jingïalehkai bapher bapher ka kyntoit kaba la tip kum ka Dong Pdengshnong, ka la ïoh ban khur ïa ka Namlahduh ba ar ka Dong Mawïaban ba lai ka Dong Mawthohthang bad kaba khatduh ka dei ka Dong Langdait.
U kongsan haba ai jingkren u la ong ba u ïohi ïa ka jingduna ka madan shnong Siejlieh ha kiba bun ki bynta bad ïa kaei kaba u bah Vincent Pala MP ka Shillong Seat u la kular ban ai 5 lak tyngka, yn leit ban buddien noh da u mar mar, khnang ba kan long ka jingmyntoi ïa ki samla bad ïa ka shnong baroh kawei.
Kum shi bynta ban pynshit pynshngaiñ shuh shuh ïa katei ka sngi leh kmen ki samla jong ka shnong Siejlieh ki la ïoh ruh ban pyni ïa ki jingshad, jingrwai bad kiwei kiwei ki jingpynbyrngia bad la pynïaid ïa katei ka jingïalang da u bah G.W.Nonglang President ka Siejlieh Sport Social & Cultural Youth Organisation.
