Shillong, Nailar 17: Kawei na ki shlem aijinghikai ha ka jingialehkai karate ba la rim tam jong ka jylla, kata ka All Meghalaya Karate Do Association (AMKA) hynne ka sngi Palei ka la thaw rekod ha ka jingwan bun ki nongïashim bynta ha ka lympung ïalehkai ba kane ka synjuk ka juh pynlong man u snem.
Ha kane ka kynti ba mynta, ka AMKA ka la ïoh ban bteng biang ban pynlong ïa ka “29th Inter School & 11th Inter College Karate Tournament 2023,” ha Multi Purpose Indoor Stadium, jong ka Sports Authority of India STC, NEHU.
Ki la don haduh 80 tylli ki skul kiba la wan ban ïashimbynta ha kane ka lympung lehkai karate bad 7 tylli ki College, kaba la tam palat spah haba nujor bad ka jingwan ki nongïashim bynta ha u snem ba la dep.
Ha kane ka sngi plie pyrda ïa kane ka jingpynlong ïa kane ka lympung la ïa don lang ruh u Bah Shakliar Warjri, Myntri ka tnat Sports & Youth Affairs kum u Kongsan bad u President ka Meghalaya State Olympic Association u Bah John F Kharshiing kum u symbud Kongsan, bad ki la don ruh ki kmie ki kpa jong ki nongïashimbynta kiba la wan ban synran bad ruh ki nonghikai na ki skul bad ki College.
Haba phai sha ki nongjop ha ka thup under-10 jong ki shynrang la jop da u Daaron R Warjri na Christian Accademy School, ha ka kyrdan lehkai Under-13 la jop da u Jason R Malniang na St. Anthony’s L.P. Ha ka thup Under-16 la jop da u Aventinus Mylliem na St. Anthony’s Higher Sec. School.
Haba phai sha ka Team Kata, kyrdan ba nyngkong la jop da ka Anthony’s Higher Sec. School. Katba ïa ka Team Taka jong ki kynthei la jop da ka Providence School.
Ka AMKA kan sa ïoh ban pyllun biang ïa ka jingïalehkai ha ki kyrdan bapher bapher ki bym pat shym la pyndep ïa ka jingïaknieh thup kyrdan ba nyngkong hapdeng ki nongïashimbynta mynta ka sngi shuwa ban jam sha ka sngi pynkut, kata lashai ka sngi ka 19 tarik u Nailar, 2023.
