Ka jingroi jong ka jingbun briew ka dei kawei na ki jingroi kaba stet bha ha ba ngi peit na ka jinglong ba man la ka sngi jong ka sor ba katba nangmih ki sngi katta ka sor ka la nang khapngiah khapngiah. Ka jingnang bun jong ki briew kaba nangkiew na kawei ka sngi sha kawei ka sngi ka la wanrah ruh ïa ka jingbun ki kam ki jam bad ka jingkhapngiah jong ki ïew ki hat bad ki jaka trei kam. Hynrei haba phai sha ki daw jong ka jingkiew jong ka jingbun briew ym lah ban len ba ka jingkiew hok jong ki trai shnong ka long tang khyndiat eh, pynban ka jingkiew kaba ratbah ka dei hi na ka daw jong ka jingïai wan buhai shnong jong ki briew kiba na bar bad kane ka dei kaei kaei kaba buh pat ïa ki trai jaka trai muluk ha ka jingma kaba ki lah ban shah tyllep noh ha kiwei pat ki heh paid kiba wan nabar ka jylla katba ki trai jylla pat ki dangïai sah kumjuh shi kumjuh.
Ha kaba ïadei bad ka jingnangbun ki nongshnong shnong katba nangmih ki sngi kane ka la nang pynktha khlieh ruh ïa ki nongsynshar shnong ban peit ïa ka bha ka miat jong ki paidbah bad ban khanglad ïa ka jingwan buhai shnong jong ki briew kiba nabar. Hynrei ha ka juh ka por ka kam ka dawa ruh ba ki nongpynïaid shnong ki dei ban long ki briew kiba stad bad kiba ïohi jngai ban pynïaid ïa ka shnong ha kata ka rukom khnang ba kan ym ktah ïa ka lawei jong ki longdien. Katba nangbun ki briew kumta ruh ki jingtei bad jingshna ïing ki la nangbun bad ki shnong bad ki dong ki la ieng da ki ïing bun mala khamtam lei ha sor bad ruh ha nongkyndong kumjuh. Kumta dei ka jingstad jong ki shnong bad ki bor pynïaid shnong ba yn lah ban peit ba kan ym don kano kano ka jingpynkhein ïa ka ain ha ka por ba tei bad shna ïa ki ïing ki sem.
Ha ki por kiba mynshuwa ki paidbah kim da salia eh ban mang lypa ïa ka jaka ban set ne buh ïa ki kali namar ba ha kito ki por ka kali kam pat da dei eh ka sobjek kaba hakhmat jong ka jingim ba man la ka sngi bad ki briew ha kito ki por kim pat da riewspah than hi ruh ban thied ïa ki kumba long ha kine ki sngi. Kumta katba nangmih ki sngi ryngkat ryngkat bad ka jingbun briew ki kali ruh ki la nangbun bad kane ka la buh jingeh bha haba leit sharum shaneng wat ki surok shnong bad surok bah ruh ki dap da ki kali haduh ba ki la ju don ki jingsahkut kali ba hap ban ap da ki kynta ban poi sha ba leit ba wan. Kat haduh kine ki sngi ki la don shibun ki dong kiba ki ïing jong ki paidbah kim long kiba lait surok bad kumta bun napdeng jong ki, kiba ïadon kali ki la hap ban pynieng ïa ki kali jong ki sha surok.
Kumta ki shnong ki dei ban long kiba ïohi jngai bad buh kyndon lypa ïa ki nongshnong shnong kiba shna ïa ki iing ki sem jong ki ba kin da mang lypa ïa ki jaka na ka bynta ban buh ïa ki kali jong ki khnang ba kin lait na ki jingeh. Ka jingïohi jngai jong ki nongpynïaid shnong kan wanrah ka jingmyntoi ïa ki paidbah hi baroh bad ka pynlong ruh ïa ka shnong ka thaw kaba itynnad bad kaba lait na ki kynrum kynram bad jingkhap ngiah. Ka long shisha kaba eh na ka bynta kito ki shnong kiba la don lypa hapoh ki jaka sor bad khap sor kiba la rim namar kiba bun na ki ïing ki sem ki dei kiba la rim bad kiba la tei skhem lypa la palat 40 ne 50 snem bad tam, hynrei wat la katta ruh haba don kino kino ki jingtei kiba thymmai ka long kaba donkam ban pyntreikam ïa kitei ki kyndon kiba pynsuk ïa ki trai ïing hi hadien.
Na ka bynta ki jaka kiba don hapoh ki thaiñ Municipal, ka sorkar ka la buh hi ïa ki kyndon kiba donkam, hynrei kito kiba don shabar jong ka Municipal ki nongpynïaid shnong ki donkam ban phikir bha khnang ban lait na ki jingeh hadien. Ka jingdon jong ki nongsynshar shnong kiba tbit kan wanrah ka jingmyntoi kaba khraw sha ki paidbah bad kan ïarap ruh ha ka juh ka por ban kyntiew ïa ka imlang sahlang. Kumta ka long kaba donkam ba wat na ka liang jong ka sorkar ruh ban pynïoh ïa ki lad jingai jinghikai sha ki nongïalam shnong khnang ba kin long ki nongïalam kiba tbit bad kiba tip ruh ïa ki kyndon jong ka ain ka imlang sahlang. Ka sorkar bad khamtam lei ki nongmihkhmat paidbah ki donkam ban shimkhia ban peit ba ki nongïalam ki ïoh ïa ki jingïarap kiba donkam khnang ba kin lah ban pynïoh ïa ka jingshakri kaba bha sha ki paidbah ha kum kine ki sngi kiba ka jingbun briew ka nangroi stet katba nangmih ki sngi.
