La pynhap pyrda noh ïa ka Don Bosco Inter School Basketball Tournament 2023
Jop ka Shillong College ha ka thup kyrdan Under-19.
Shillong, Nailur 03: Ka St. Anthony’s Higher Secondary School kaba pynïaid ïa ka lympung ïalehkai Basketball kaba la tip da ka‘Don Bosco Inter School Basketball Tournament 2023’, ka la ïoh ban pynhap pyrda noh hynnin ka Sngi Saitjaiñ ha St. Anthony’s Higher Secondary School Basketball Court hadien ba ladep ban pynïakhun ïa baroh ki final jong ki kyrdan bapher bapher, kiba kynthuplang jong ki shynrang bad kynthei.
Khyndiat ha kaba ïadei bad kane ka lympung, na ka liang jong ki nongpynïaid ki la bynta ha ki lai kyrdan lane categories, bad kine ki kynthup ïa ka Under-14 shynrang bad kynthei, nangta ka Under-16 (Shynrang & Kynthei) bad ka Under-19 (shynrang & kynthei). Ki la don haduh 58 tylli ki skul kiba la wan ban ïashimbynta bad la pynïakhun haduh 98 tylli ki jingïalehkai haba kyllumlang haduh ka final jong baroh ki kyrdan shynrang bad kynthei.
Haba phai sha ka jingïakhun final kaba nyngkong jong ka Under-14 kynthei, ka St Mary’s Higher Secondary School ka la ïoh ban khur ïa ka namlahduh hadien ba ki la pynliem ïa ka Pine Mount Higher Secondary School da 39-31 basket point.
Katba ha ka thup Under-14 shynrang kaba la long hadpeng ka St Anthony’s Higher Secondary School pyrshah ïa ka H.Elias Higher Secondary School ka la jam sha kaba kut ha kaba ka St Anthony’s ka la khur ïa ka namjop da 35-19 basket point ban long lahduh.
Hadien ba ladep ïa ka thup kyrdan jong ki Under-14 kynthei bad shynrang, la ïoh ban pyntyllun sa ïa ka final jong ka kyrdan Under-16, bad ïa ka namlahduh jong ki kynthei la rah da ka St Paul’s Higher Secondary School kaba la jop salit ïa ka St. Mary’s Higher Secondary School da 38-37 basket point.
Katba na ka thup ki shynrang la rah da ka St Anthony’s Higher Secondary School kaba la pynliem ïa ka Sacred Heart Boys Higher Secondary School da 84- 75 basket point.
Haba phai pat sha ka thup kyrdan ba khadduh jong ka Under-19 ïa ka namlahduh la jop da ka Shillong College ha baroh ar thup, ha ka thup jong ki kynthei ka la jop da 56-45 ïa ka Loreto Convent bad ha ka thup jong ki shynrang ka Shillong Colege ka la pynliem da 69-49 basket point ïa ka St. Edmund’s Higher Secondary School ban rah namlahduh.
Ha kane ka sngi pynkut ïa kane ka Tournament la wan sakhilang da i Kong Ampareen Lyngdoh kum i Kongsan ryngkat bad u Bah Joel Marbaniang President jong ka Meghalaya Basketball Association kum u symbud kongsan lem bad kiwei kiba la shah khot sngewbha.