Shillong, Nailur 03: Ka Meghalaya Association of Kickboxing Organizations (MAKO) ka la ïoh ban pynseisoh ïa ka jingpynlong jong ka ïa ka 26th Meghalaya State Level Kickboxing Championship kaba la sdang naduh ka 31 tarik u Nailar bad jam sha kaba kut ha ka 1 tarik Nailur, 2023 ha Headquarter jong ka Meghalaya School of Martial Arts (MSMA), Kynton-U-Mon kaba la shem naduh snem 1983.
Ha kane ka kynti ba mynta, ki la don haduh 80 ngut ki nongïalehkai Kickboxing bad 10 ki dkhot jong ka Technical Official, 50 ngut ki dkhot nongpynïaid, ki volunteer bad 40 ngut ki kmie ki kpa kiba la wan ban shimbynta ha kane ka sngi ba khadduh jong kane ka Championship.
Ki nongïalehkai jong ka East Khasi Hills District ki la long ki lahduh jong kane ka Championship, nangta bud sa ka East Jaintia Hills District ha ka kyrdan ba ar.
Kumban shu pynkynmaw, la wan plie pyrda ïa kane ka Championship da u Chairman jong ka MSMA u Bah .D.R.Ranee katba ha ka sngi pynkut bad ka jingsam khusnam sha ki nongjop la wan da u Bah John Khyriem, u rangbah ba ju don bynta ban kyrshan ïa ka MAKO ban pyndep ïa ka Kickboxing Ring ban ïoh pynlong ïa kane ka championship.
Na ka liang jong ki nongpynïaid ki la pyntip ba baroh ki nongjop ha kane ka Kickboxing Championship kin sa shah jied ban mihkhmat ïa ka jylla ha ka National Kickboxing Championship, 2023 ka ban sa sdang shen naduh ka 1 tarik haduh ka 3 tarik, Risaw, 2023 ha Dehradun, Uttarkhand.
