La plie bad pynkyntang ïa ka ïingmane kristan jong ka Star Christian Fellowship ha Star Cement Lumshnong

Khliehriat kyllalyngkot 12: U Managing Director jong ka company Star Cement, u Prem Kr.Bhajanka, u Executive Director jong ka Star Cement Company, u Pankaj Kejriwal, ha ryngkat ka jingia don lang u Moderator KJP Synod Sepngi, u Rev C.L.Laloo, u Rev. M.K.Lyngdoh, u Fr. Petrus Baniak, uba dei u Parish Priest jong ka Lumshnong, lem ki dkhot jong ka Star Christian Fellowship, kumjuh ruh kiba shah khot sngewbha, u la plie ïa ka ïingmane kristan hapoh Star Cement Company ha Lumshnong.
Ha shwa ban plie ïa ka ïingmane, baroh kiba la wan sha kane ka prokram ki la ïa ïaid sawdong- sawdong ïa ka ïingmane ryngkat ka jingrwai ‘Me long ba khraw, me long ba khraw…..’ kum ka dak ka jingpynkyntang ïa kane ka ïangmane bad hadien kane ryngkat ka jingdwai ba la ïalam da u Rev C.L. Laloo la plie ïa u mot sah jingkynmaw da kitei ki heh jong ka company bad la ot ruh ïa u ribon ban rung shapoh ka ïingmane.
U Rev C.L.Laloo, haba sam ïa ka ktien u Blei, u la pynshnongnongrim na ka ktien u Blei na ka kitab Jenesis lynnong 28 dkhot ba 17 bad na ka kitab ba ar ki Khronikle dkhot ba 15 bad 16, u la kyntu ïa ki dkhot jong ka Star Christian Fellowship ban long kiba hok ha ka jingmane, ban long kiba biang por ban pyndep ïa ki kam jingmane, ban trei hok bad trei bha ruh ïa la ki kam ki jam bad leh ïa ki kam ha ka por ba biang, haba kren kyllum u la kyntu lang ïa baroh ki kristan bad kito kiba na kiwei pat ki niam ban long kiba ïa ieid bad ïa burom iwei ïa iwei pat.
U Rev M.K.Lyngdoh, u la pule na ka ktien u Blei, kitab Jenesis 28-17 bad kitab ba ar ki Khronikle “Te ki khmat jong nga kin piet bad ki shkor jong kin sngap ba ka jingdwai kaba yn pynlong ha kane ka jaka namar mynta nga la jied bad nga la pynkyntang ïa kane ka ïing ba ka kyrteng jong nga ka lah ban long hangta hala kyrta ba ki khmat jong nga bad ka dohnud jong nga kan long hangta junom”…
Ki heh jong ka company Star Cement ba kynthup u Managing Director, u Prem Kr Bhajanka lem bad u Executive Director, u Pankaj Kejriwal ki la pynpaw ka jingsngew kmen ba ki la lah ban pynurlong ïa kane ka jing shna ïa kane ka ïingmane ha Star Cement, ki la ong ruh ba ïa ki briew jong ka jylla Meghalaya khamtam ki nongshong shnong jong ka shnong Lumshnong ki la sngew kum kiba ha ïing ha sem, u la ong ruh ba kane ka ïingmane ka dei kaba la angnud la slem bha ban shna bad mynta la lah ban pynurlong.
Na ka liang u Secretary jong ka Star Christian Fellowship , u bah ISmile Suchen lem bad ka kynhun ki la pynpaw ka jingsngew kmen bad sngew nguh ïa u Blei ba ki la ioh ïa kane ka iingmane ha ka jaka ba ki trei, ki la ai ruh ka jingkhublei ïa u Prem Kr Bhajanka lem bad kiwei kiwei ki heh jong ka company Star Cement kiba la lah ban pyn ioh ïa kane ka iingmane ha kaba ki la lah ban pynlong ïa ki jingiaseng, ki jingdwai.
La ioh ruh ïa ka jingrwai choir na ka kynhun jong ki kristan kiba trei ha Star Cement ba la tip kum ka Star Christian Fellowship bad na ka choir jong ka balang Presbyterian Lumshnong. Kiba la ïa don ryngkat lang ha kane ka prokram ki kynthup ruh u Rev. E.K.Mujat, Executive Secretary Narpuh Border Presbytery, u Rev.K.Laloo, Rev P.R.L.Gadew , Rangbah Shnong Lumshnong, u bah Monlang Ladong, Principal Jaiñtia Eastern College Khliehriat., Dr P.Nongtdu bad kiwei kiwei ki riew rangbah ba la khot sngewbha.