Shillong, K’lyngkot 12 : “Lada ka Sorkar Meghalaya Democratic Alliance (MDA) ka khlem treikam, kumno ki briew ki dang jied ïa u Conrad K Sangma kum u Myntri Rangbah ka Jylla bad ïa ka Party NPP kaba u ïalam ban thaw Sorkar ha ka sien ba ar”.
ïa kane la ong da u Myntri ka tnat PHE u Marcuise N Marak haba ïadei bad ka jingkynnoh u President ka Meghalaya Pradesh Congress Committee (MPCC) Bah Vincent Pala baka Sorkar MDA ka nang tang ban kular hynrei kam lah satia ban pynurlong ïa ki jingkular.
Haba jubab ïa ki jingkynnoh u Marcuise ula ong “Ngi dang shu dep ka elekshon MLA 2023 bad lada ka National People’s Party (NPP) kaba ïalam ïa ka Sorkar MDA kam trei, balei ki paidbah ki dang jied biang ïa u Conrad K Sangma bad ïa ka Party jong u ban thaw Sorkar”.
U Marcuise ula ong ba kane ka jingjied biang ki paidbah ïa ka NPP ka pyni ba ka NPP kala trei bha na ka bynta u paidbah bad ha kane ka kynti kaba ar, ka Sorkar Jylla ha ka jingïalam u Conrad K Sangma kala sdang ban trei bha biang lyngba shibun ki rai jong ka kynhun Myntri Sorkar ki ban pynmyntoi ïa ki paidbah bad ïa ka Jylla.
Ha kaba ïadei bad ka jingkam ba ka Congress, kan jop ha baroh artylli ki Parliamentary Seat, kata ha Shillong bad Tura, u Marcuise ula ong “Ngam ïohi baka Congress ka don kano kano ka jingkyrmen ba ka jop haka ilekshon MP Lok Sabha na Meghalaya ne ba kan wan biang haka bor ha Delhi”.
“Lyngba ki kam ba ka Sorkar Jylla ha ka jingialam ka NPP ka la leh na ka bynta ka bha ka miat ki paidbah bad ka Jylla baroh kawei. Nga thikna ba 100% ka NPP kan jop ha baroh artylli ki Parliamentary Seat”.
