Shillong, K’Lyngkot 12 : Kum shi bynta ban pynkhlaiñ ïa ki lad jingsumar, ka Myntri ka tnat ka koit ka khiah ka Jylla I Kong Ampareen Lyngdoh, mynta ka sngi Thohdieng, i la plie ïa ki mawnongrim ban tei ïa 2 tylli ki Critical Care Blocks (CCB) bad 5 tylli ki Integrated Public Health Laboratory (IPHL) ha Jylla.
Ki Critical Care Blocks (CCB) ki dei ki Hospital ba 50 jingthiah bad ïa ki 2 tylli ki CCB yn tei ha Williamnagar, East Garo Hills bad ha Khliehriat, East Jaintia Hills.
Ki 5 tylli ki Public Health Laboratory (IPHL) ki dei ki jaka ban leh Test kum ïa ka snam, umbiah, jingpynjhieh bad kiwei kiwei ki jait jingpang kiba ïabit.
ïa kine ki jaka Test lane ki IPHL lah dep ban tei kawei ha Pastures Institute Lawmali Shillong East Khasi Hills bad mar kawei yn tei ha Jowai West Jaintia Hills, ha Mawkyrwat South West Khasi Hills ha Mendipathar North Garo Hills bad ha Ampati South West Garo Hills.
Haba kren sha ki lad pathai khubor, I Kong Ampareen I la ong “Ka Sorkar Pdeng ka la shimkhia ban ïarap ïa ka Sorkar Jylla ban kyntiew bad pynbha ïa ki jaka ai jingsumar ha baroh kawei ka Jylla bad mynta ka sngi, la lah ban plie ïa ka IPHL Pasture Institute bad ban buh mawnongrim ban tei sa ïa ki 6 tylli kiwei ki Project ha kylleng ka Jylla”.
I Kong Ampareen i la ong ba ka jingdon ki IPHL hapoh ka Jylla, kan ïarap ïa ki paidbah ban leit phah Test ïa ki jingdonkam khlem kano kano ka jinglut namar kine ki dei jong ka Sorkar bad naduh mynta ka sngi ïa ki Test ym dei shuh ban phah sha ki Hospital shimet.
I la ong ba ki IPHL ki dei kiba la pynwan dur da ka Sorkar Pdeng na ka bynta ban pynbha ïa ki jait rukom Test ïa ki jait jinpang bad kine ki IPHL kin peitngor ïa ka jinglong jingman ka koit ka khiah hapoh ka Jylla khamtam ïa ki jait jingpang ki ba lah ban ïa pur kum ka khlam COVID ha ki snem bala dep.
Haba kylli ïa ka jinglut ban tei iaki IPHL, ka Myntri ka tnat ka koit ka khiah kala ong “Ngam don ïa ka jingkheiñ kaba thikna hynrei ka lah ban kot sha ka T.1.25 klur ban tei ïa ka Pasteur Institute hynrei watla katta ruh, nga donkam ban eksamin ban thikna ïa ka jinglut”.
