Nongpoh, Kyllalyngkot 12: Hadien ka jingmih ka kaiphod halor ka jingpynmih ka jingjakhlia kaba palat pud hapoh ka thain Byrnihat kaba lah ban ktah ïa ka koit ka khiah ki paid nongshong shnong jong katei ka thain lyngba ka jingdon jong ki Karkhana bapher bapher, mynta ka sngi na ka liang ki nongïalam ka Hynniewtrep National Youth Movement (HNYM) ki la leit ai da ka dorkhas sha u Deputy Commissioner ka Ri Bhoi District ban dawa na ka Meghalaya State Pollution Board ba kan shimkhia halor kane ka bynta.
Ha kane ka jingleit ban buh ïa ka jingujor bad ka jingdawa na ka liang ka HNYM, la lamkhmat da u samla Donald Muktieh, President ka Ri Bhoi District Unit lem bad kiwei kiwei ki nongkitkam kane ka seng ha kaba ki la ioh ban aiti ïa ka shithi ujor sha u Additional Deputy Commissioner ka Ri Bhoi District u Bah MB Tongper ba ki la kynduh mynta ka sngi ha ka ophis treikam jongu ha Nongpoh.
Haba kren bad ki Nongthoh Khubor, u Bah Donald Muktieh u la pynpaw ïa ka jingsngewkhia kaba jur halor ka jingmih kyrteng jong ka thain Byrnihat ha ka thup jong ki thain kiba pynmih ïa ka jingjakhlia kaba jur khamtam ka lyer ba jakhlia namar ka jingdon jong ki karkhana bapher bapher kaba la ktah ïa ka koit ka khiah jong ki paidbah nongshong shnong jong kane ka thain ha Byrnihat.
U la ong ruh, ba na ka liang ka seng hadien ka jingioh khubor halor kane ka jingpynmih ïa ka jakhlia kaba shyrkhei ha ka thain Byrnihat lyngba ki Karkhana kiba don ha katei ka thain, na ka liang ka seng hi ka la ujor sha u DC ka Ri Bhoi District ban shimkhia ban phah jurip bad ban tohkit ïa ki karkhana kiba don ha kane ka thain lyngba ka Meghalaya State Pollution Control Board khnang ban lah ban weng noh mardor ïa kane ka jingmih jakhlia kaban ktah ïa ka koit ka khiah jong ki paidbah nongshong shnong ha ka thain Byrnihat bad kiwei kiwei kiba Marjan.
