Kmen ki paidbah ka Raid Madan Kyrdem ba la sdang pynbha ka sorkar ïa ka surok na Bhoirymbong sha Kyrdem

Nongpoh, K’lyngkot 12: Hadien ba ki paidbah ka Raid Madan Kyrdem lem bad kiwei kiwei ki shnong ki la syrtok shisha ha ka leit ka wan la bun phew snem mynta na ka jingsniew ka surok na Bhoirymbong sha Kyrdem bad kiwei kiwei ki shnong ba pynïasoh lyngba kane ka surok bad ka long pat ka jingsngewkmen kaba khraw ïa ki paidbah katei ka thaiñ, kaba dei hadien ba ki la iohi ïa ki dak ki shin ba ka sorkar shen kan pynbha bad siang rong thymmai ïa katei ka surok paidbah.
Kum ban pynkynmaw, kane ka surok ka dei ka surok kaba pyndonkam da ki phew tylli ki shnong ha katei ka thaiñ, ha kaba ki paidbah ki la syrtok shisha ha ka leit ka wan na ka daw ka jingsniew ka surok bad ka jingphai khmat ka sorkar ban pynbha ne siang rong ïa katei ka surok ka la long ka jingai mynsiem bad ka jingpynkmen ïa kiba bun ki paidbah katei ka thain ba shen kin sa ioh noh da ka surok kaba la bit la biang ha ka leit ka wan.
Halor kane ka jingshim khia ka sorkar lyngba ka tnad PWD ban pynbha ne siang rong noh ïa katei ka surok ha kaba ki kam ki la ïaid shaid shaid mytna, u Acting Sirdar ka Raid Madan Kyrdem, u Bah Pholning Makdoh, u la ong ba ki nongïalam Raid ki dap shisha da ka mynseim jong ka jingkmen ban iohi ïa ki dak ki shin ba ka sorkar ka la sdang ban pynbha ïa katei ka surok, ka daw ka long ba baroh shi katta ki paidbah nongshong shnong ki la syrtok shisha ha ka leit ka wan ka daw ka jingsniew palat ka surok, la ong u Acting Sirdar ka Raid Madan Kyrdem.
U la ong ruh ym lah ban len ka surok ka dei ka budlum jong ka ioh ka kot ki paidbah, ha kaba ki paidbah ki donkam ïa ka surok kaba bit ba biang bad kane ka jingshim khia ka sorkar ban pynbha noh ïa katei ka surok ka dei kaba kum ki nongïalam Raid ki ai ïa ka jingïaroh naduh ka sorkar, ki ophisar bad ki nongmihkhmat ka Umroi Constituency.
U la ïathuh ruh ha ka jingshisha katei ka surok kam dei tang kaba pyndonkam ki paidbah nongshong shnong ka Raid Madan Kyrdem, hynrei ka dei ka surok kaba pyndonkam da kiwei ruh ki shnong kaba pei lyngba shaduh sha Khyndewso ban mih sha Assam bad ka long ruh ka jingkmen ba lada ka sorkar ka kloi ban pyndep ïa katei ka surok naduh na Bhoirymbong sha Khyndewso bad na Nongthymmai sha Mawbsein ka la ïarap shibun eh ban pynsuk ïa ki paidbah ha ka leit ka wan ym kumba ki la jynjar baroh shi katta na ka daw ka jingsniew palat ka surok.
Shuh shuh, u la ong ruh ha kawei ka bynta kum ka Raid Madan Kyrdem kam lah khlem da ai ka jingkhublei bad ka jingsngewnguh ïa ka sorkar, ka tnad PWD bad ruh ki nongmihkhmat, ba dei lyngba ka jingshim khia jongki, ba la lah ban pynbha ïa kane ka surok bad na ka bynta ka jingmyntoi ki paidbah kum ka Raid ka kyrpad ruh ïa ka sorkar bad ka tnad PWD ba kin phah pyndep kham kloi ïa katei ka surok khnang ba kan long shisha ka jingkyrkhu ïa ki paidbah ha ka leit ka wan, u la bynrap.