Nongstoiñ, K’lyngkot, 12: “Ka jingleit pynïasoh jong u bah Kimfa S Marbañiang sha ka National Poples Party hadien ba u la shah suspend na ka Congress, khlem da kynjoh ktien sha ki nongïalam jong ka party hapoh ka Constituency bad ruh sha ki paitbah nongkyrshan, ka la pynngiah shoiñ ïa ki paitbah”, ong u bah Bormanding Nonglang President ka West Khasi Hills District Congress Committee.
U bah Nonglang haba ïakren bad u nongthoh khubor, u la ong ba na ka liang ki paitbah nongkyr-shan jong u hapoh ka constituency, ki dang ïaineh bad skhem triang ha ka Congress bad kim kwah satia ban leit kyrshan biang ïa u. Nalor kata u la ong ruh ba ki paitbah ka Rambrai Jyrngam constituency mynta kim kwah shuh ban pynjop ïa u ha kane ka election bad wan.
Haba kylli pat ha kaba ïadei bad ka jingmih bun ki kyrtong na ka constituency ha kane ka election ban wan, u bah Nonglang u la ong ba ka jingmih bun ngut ki kyrtong ka dei pynban ka kabu ksiar ïa ka Congress ba kan jop. Nalor kata u la ong ruh ba kumba ka long mynta, palat marshiteng ki paitbah nongkyrshan jong ka Congress ha Rambrai Jyrngam, kin ym kynriah da lei lei na ka party bad katba nang mih ki sngi ka party ka nang khlaiñ.
U bah Nonglang u la ong ruh ba ki don shibun ki kam kiba u MLA ka Rambrai Jyrngam u la pyndonkam bakla ïa ki skhim ba ka sorkar ka la mang na ka bynta ki paitbah nongshong shnong, kaba la ktah haduh katta katta ïa ki paitbah. Halor ka jingwanrah jong u MLA ïa ka C&RD Block ha Rambrai, u bah Nonglang u la ong ba ka Block ka dei ka mat kaba la dawa da ki paitbah la slem bha bad ka la dei hok ban ïoh. Hynrei, ban shu kam ba la pynïoh da u MLA te kam lah ban long namar u bah Kimfa u dang shsh jied kum u MLA ha u 2018.
U la ong ruh ba ka jingplie mawnongrim kam don jingmut lada ym pat don ïa ka ophis ba pura ba la shna da ka sorkar, namar ym lah ban tip haduh katno kan shim por ba ka sorkar kan mang pisa ban shna ïa ka Block Ophis. Haduh lano kan khot Tender namar mynta ka ophis ka dei ha ka ïbng jong u MLA ha kama ki paitbah kim tip satia la u shu pynshong ei ne la shim wai da ka sorkar.
