Kumno ka Sorkar kan leh ïa ki ar maloi shwa ka elekshon ? : Sordar Mawïamsyiem

0

Nongstoiñ, K’lyngkot 12: “Lada ka sorkar bad ki bor pynïaid District jong ka West Khasi Hills kiba dei peit ïa ka election, kim lah ban leh ei ei ïa ki nongshong shnong ha khappud kiba ju leit thep vote ha Assam bad Meghalaya, ka jingïakren pynbeit pud kan ym poi shano shano ruh”, ong u bah P.Nongshlong sordar ka shnong Mawïamsyiem kaba doh shaphang shatei na Langpih ha syndah bad ka jylla Assam.
Utei u sordar jong katei ka shnong u la ong ruh ba naduh ba u dang sdang ban leit shong shnong ha katei ka jaka, um shym pat la lah ban pynthikna ba ki don shibun ki nongshong shnong ha katei ka thaiñ kiba thep vote ha Assam bad ha Meghalaya. Hynrei dang shen, u la lap ïa kawei ka Election Photo Identity Card kaba la shu Xerox bad katei ka EPIC, ka dei kaba don ha Assam bad ha Meghalaya.
U la iathuh ba u la lum ïa baroh ki paidbah nongs-hong shnong ban tohkit, hynrei ha kaba nyngkong kim shym la ïathuh satia hynrei ki len bad ki ong ruh ba kim kwah ban leit bad ka Assam. U la ong ruh ba wat la kim treh ban ïathuh, kum u nongsynshar shnong u la ther da kaba tyngeh bad u la maham ruh ïa ki, da kaba ong ba lada kim ïathuh ïa ka jingshisha un khot da ki briew ka aiñ na Meghalaya bad na Assam ba kin tohkit kham bha shuh shuh. U la ong ruh ba hadien ba u la ther da kaba tyngeh baroh kiba don EPIC ha baroh ar liang ki la phla lut bad lada kheiñ ka jingdon jong ki baroh ka la palat ïa ka shispah ngut tang ha katei ka thaiñ.
U bah Nongshlong u la ong ruh ba ha kaba ïadei bad ka jingdon ar tylli ki EPIC bad ka jingthep vote ar jaka jong kitei ki nongshong shnong, um shym la pynbor ïa ki ba kin wan noh sha Meghalaya ne ba kin leit sha Assam. Hynrei u la ong ïa ki ba lada ki kwah ban leit shano shano ruh ka shong ha ka mon jong ki, tangba u la maham pat ba kim dei ban buh ar tylli ki EPIC ne ban leit thep vote ha baroh ar liang, hynrei ki dei ban rai ba kin don beit tang ha kawei ka jylla la ka dei ha Meghalaya ne bad ka Assam.
U la ong ruh ba baroh shikatta phew snem, ka Assam ka kynnoh ba ka Meghalaya ka kyntur pud bad ka Meghalaya ka kynnoh ba ka Assam ka kyntur pud. Kitei ki jingeh baroh kiba mih ha khappud ka dei kaba ki paidbah shnong ki thaw hi hynrei lada dei ba ki paidbah kim thaw hi, kan ym don satia ka jingklumar namar lada ki paidbah kim pdiang satia ïa ki jingmyntoi ba ka sorkar Assam ka wan tyrwa, kan ym nud ban kam ba katei ka thaiñ ka dei jong ka Assam.
Kumta halor katei ka mat u bah Nongshlong u la kyntu ïa u District Election Officer jong ka West Khasi Hills, ba u dei ban leh ei ei ïa kitei ki ar maloi shuwa ka election ka ban long ha u 2023. Ka sorkar ka la dei ban pynkloi katba lah ban khot ïa kitei ki briew ba kin wan ai ka jubab kaba shai lada ki kwah ban sah ha West Khasi Hills, ki dei ban phah weng noh ïa ki kyrteng kiba la pynrung ha ka Assam. Lada ki kwah ban sah ha Meghalaya bad lada ki kwah ban leit sha Assam ruh kin jubab da kaba shai, khnang ba kin weng noh ïa ki kyrteng jong ki na ka thup jong ka Electoral roll jong ka West Khasi Hills.

Leave A Reply

Your email address will not be published.