Plie paidbah u myntri sorkar ïa ka madan ïalehkai ba siang da ki artificial turf ha Deinchynrum East Jaiñtia Hills

Khliehriat kyllalyngkot 12: Ka East Jaiñtia Hills District ka la ïoh ïa ka madan ialehkai football kaba paka bha ba la siang da ki phlang artificial turf kaba ha ka jinglut kaba T2.5 klur tyngka, kaba la bei tyngka da ka District Mineral Funding Trust ha ryngkat ka jingnoh syniang kaba T 20 lak tyngka da u myntri sorkar, uba dei u MLA ka 6-Khliehriat Constituency, u bah Kyrmen Shylla, ïa kane ka madan la plie paidbah mynta ka sngi da utei u Myntri sorkar kum u Kongsan bad u Deputy Commissioner ka East Jaiñtia Hills District, u Abhilash Banarwal, IAS kum u Symbud Kongsan.
Kum ka dak ka jingplie, u bah Kyrmen Shylla bad u Deputy Commissioner ka East Jaiñtia Hills District, ki la kynjat nyngkong eh ïa ka bol ha katei ka madan.
Ynda la kut ka jingïalang, ka la don ar tylli ka jingialehkai Footbal (Friendly Match) ha katei ka madan ba la ïakhun hapdeng ka kynhun jong ki ki dkhot ka East Jaiñtia Football Association pyrshah ïa ka kynhun ba la shim bynta da ki nongmihkhmat, ki Waheh Shnong bad ki heh sorkar jong ka district bad kawei pat ka Shillong Lajong Sport Club pyrshah ïa ka Super Division Champion EJFA (Rymbai Yawpynsing).
Haba kren ha ka jingïalang, u bah Kyrmen Shylla, u la pynpaw ka jingsngew kmen halor ka jinglah ban pynurlong ïa kane ka madan football kaba itynnad ha East Jaiñtia Hills District bad u khmih lynti ruh ba kin sa nang mih shuh shuh ki rang bad ki thei ïalehkai sport na kane ka district ki ban wanrah ïa ka nam, ka burom ym tang ïa ka district, hynrei ïa ka jylla bad ïa ka ri hi baroh kawei, u kular ba un sa nang pynioh shuh shuh ïa kum kane ka madan hapoh ka district ha man la ka san snem lada u dang ïai jop kum u nongmihkhmat na ka thaiñ “ Nga ai khublei, ïa u Deputy Commissioner ka East Jaiñtia Hills District, ki Football Association, ki Sport Club bapher bapher kiba ju ïa don ryngkat lang man ka por, kumta la lah ban pyndep ïa kane ka madan ha ka por kaba biang, ngi la trei shitom ban pynbit pynbiang bha ïa kane ka madan”
U pynpaw ka jingkmen ba ki kmie ki kpa, ki ba heh ba san ki la kylla ka pyrkhat pyrdaiñ ha kaba ki la sngewthuh bad ailad bad ai jingkyrshan ïa ki khun ba kin mih shakhmat ban ïa shimbynta ha ki jingialehkai sport bapher bapher, u ai khublei ïa baroh kiba la nohsyniang da ki tiar ki tar, kumjuh ruh da ki kyntien ai mynsiem bad pynshlur ïa ki khun samla ban kiew shaphrang ha kaba ïadei bad ka jingialehkai football bad kiwei kiwei ki jingialehkai sport.
U bah Kyrmen, u la pynsngew ruh ba kane ka madan football kaba don ha Deiñchynrum, ka dei ka jaka ba la ai sngewbha da u kpa jong u, u ba dei u MDC ba rim, u bah Kor Sympli bad u pynpaw ka jingsngew kmen haba iohi ïa ka khmat ba phuh ba phieng jong u kpa uba dei ruh uwei na ki riew ieid football “Pa sngew kmen ban ong ba dei namar ka jingieid jongphi ïa ka district jongngi bad kine heh ba san bad kiba peit ïa ka Association ruh kim shym la klet satia ïa kane ka jingai jingiarap jongphi ba phi la ai ïa kane ka jaka ba la pynlong ïa kane ka madan football” bynrap u bah Kyrmen.
Da ka mynsiem kaba kmen, u Symbud Kongsan, u Abhilash Banarwal, IAS u la ong ba “Nga khmihlynti ba nangne shakhmat ka East Jaiñtia Hills kan sa nang pynmih ïa ka rang ïalehkai football kiban mihkhmat na ka jylla, na ka thaiñ bad na ka ri India bad kane ka dei kata ka jingphohsniew kaba la lah ban pynurlong shisha”, u la ai khublei ïa u bah Kyrmen Shylla, u Waheh Shnong ka Deinchynrum, ïa u Secretary East Jaiñtia Football Association, u bah Coming One Joy Tlang lem bad ki dkhot jong ka Football Association, ïa ki heh sorkar khamtam u ADC, u bah Jonathan Shylla, kumjuh ruh u bah Lumlangki, ïa ka kynhun jong ka DMF, ïa u contractor uba pyntrei bad baroh kiba la ïatrei shitom lang ban pynbit pynbiang ïa kane ka madan “ Hadien ka jingwad jingtip, nga ka sngewthuh ba kane ka jingshna ïa kum kane ka madan kan lut haduh T2 klur tyngka tam ha kaba na ka District Mineral Funding, kam lah ban bei tyngka haduh kata, kumta nga sngew kmen ba na ka liang u bah Kyrmen Shlla, u la mih shakhmat bad noh syniang T 20 lak tyngka, kumta la ioh ban sdang ban shna ïa kane ka madan kaba bha haduh katta hapoh ka jylla Meghalaya”
Kum u Chairman jong ka DMF bad u President jong ka East Jaiñtia Football Association, u Abhilash Banarwal, u la ong ba ki paidbah jong ka district ki dei ki briew kiba ieid football haduh katta katta, u la ïathuh ruh ba naduh ki saw-san bnai ba la leit u la don kane ka jingmut ban pynurlong ïa kane ka Artificial Turf hapoh ka district, kumta u la ïoh ka lad ban ïakren bad u bah Kyrmen Shylla bad kumta hi ki la ïa sdang ïa ka kam ban wanrah ïa kane ka madan artificial turf bad lehse kane kan pyni ba ka East Jaiñtia Hills District ka biang na lade.
U Shongknor ba pynïaid ïa ka prokram, uba dei ruh u Secretary jong ka East Jaiñtia Football Association, u bah Coming One Joy Tlang, u la pynpaw ka jingsngew nguh ïa u Deputy Commissioner bad ïa u bah Kyrmen Shylla kiba la trei radbah ban pynurlong ïa kane ka madan, u la ai khublei sngew nguh ruh ïa ki longshwa kiba la pruid dak ban pynlong ïa kane ka jaka kum ka madan ïalehkai football bad ong ba ka jingdon kane ka madan kan ïarap shibun ïa ki smala kiba ieid ïa ka jingialehkai football bad kiba ieid ïa ka sport.
Ha kane ka sngi, la ioh ruh ban pynkup burom ïa ki samla jong ka district, kiba la leit ban mihkhmat sha ka lympung Meghalaya Game, North East Olympic 2022 bad sha kiwei kiwei ki rynsan, kiba la wanrah burom da kaba ki la ioh khur ïa ki takma ksiar, takma rupa bad takma rngong kaba la long ka burom ym tang ïa ka district hynrei ïa ka jylla ruh.Kiba la shah pynkup burom, ki kynthup u Elewan Dkhar (Gold Medal Athletic), Bhalang Shadap (Bornze bad Gold Medal), Damewanki o Suiam (Cyclist), Nicholas Syrti (Cyclist), Nelson Rymbai (Football), Shainlang Lamurong (Wrestler), Fivestar Bareh (Wrestler).
U bah Kyrmen Shylla, u la nohsyniang ruh da ki tiar ïalehkai Badminton ha kaba la aiti ïa ki tiar sha u President Badmintom Association East Jaiñtia Hills District, u bah Joshua Sajem.