Khliehriat kyllalyngkot 14: Ki pulit jong ka Ratacherra Infiltration Check Post ha ryngkat ka jingiatreilang bad ki pulit ka Umkiang Patroling Post kaba hapoh ka jingïalam u Additional Superintendent of Police East Jaiñtia Hills District, u bah Banraplang Jyrwa, MPS, mynta ka sngi ki ioh ban kurup 1.2 kilo u drok Yaba Tablet , ki dawai kuli (amphetamine) na ki saw ngut ki briew kiba la donkti ha kane ka kam.
Ha kaba ïadei bad kane, ki pulit ki la kem noh ïa ki saw ngut kiba donkti kiba la tip kyrteng kum u Sajul Islam, u Jabir Hussain Barbhuiya, u Abdul Mohit Barbhuiya bad u Ratikul Islam Barbhuiya bad ki pulit ki la kurup noh ruh ïa kawei ka kali maruti Alto kaba don u registration number ML-11-3832 lem bad saw tylli ki mobile phone.
Ia ka ejahar la register ha Lumshnong Police Station bad ka jingtohkit ka dang ïaid ban lap shuh shuh ïa kiba donkti ha kane ka kam khaïi drok.
