Na ka CMHAP, ïoh jingïarap ki 400 ïing hapoh ka Mawkyrwat Block

Mawkyrwat, K’lyngkot, 12: U bah Renikton Lyngdoh Tongkhar, Myntri ka tnad PHE bad nongmihkhmat ka Mawkyrwat Constituency, mynta ka sngi u la sam ïa ki tin sop ïing sha ki 400 tylli ei ei ki longïing ba hapoh ka Mawkyrwat C&RD Block lyngba ka Chief Minister’s Housing Assistance Programme (CMHAP) ha ryngkat ka jingïadonlang u Block Development Officer, Mawkyrwat.
Lah ban kdew ba ïa kine ki tin sop ïing lyngba ka CMHAP la ïoh ban sam mar mar lai (3) ban kawei ka longïing.
U bah Renikton Lyngdoh Tongkhar, u nongmihkhmat jong ka Mawkyrwat Constituency bad Myntri ka tnad umbam umdih jong ka Sorkar Meghalaya u la ong ba ai ba une u snem 2023 un long u snem jong ka jingkyrkhu bad long ka jingïarap na ka bynta ki longïing ba duk ha kaba mynshwa ki tap da ki skul hynrei lyngba kane ka jingïarap na ka MLA Scheme kin ïoh noh ba tap da ki tin bad ba kan long ka jingker jingda na u slap bad ka lyer.
U bah Renikton lyngba ka Chief Minister’s Housing Assistance Programme (CMHAP) u don ka jingkyrmen ba kan long ka jingïarap na ka bynta kiba bun ki longïing kiba dei hok ban ïoh bad u khmih lynti ruh ba ha kine ki snem kiba ban wan ynsa lah biang ban ïoh ban ai shuh shuh sha ki longïing kiba donkam ki lad jingïarap. “Nga angnud ban wanrah ki jingkylla ha kiba bun ki liang bad um kwah shuh ban dang ïohsngew ne ïohi ïa ka jingduk jingkyrduh ha ka thaiñ Mawkyrwat bad ruh hapoh ka jylla Meghalaya hi baroh kawei”, ong u bah Renik.
Ha kajuh ka por u la buh ruh ki kyntien kyrkhu kyrdoh ïa ki paidbah jong ka Mawkyrwat Constituency ba kin nang ïai kiew ha ki kam ki jam ha baroh ki liang bad u don ka jingkyrmen ba lyngba ka jingïoh ïa ki tin sop ïing kan long shisha ka jingkyrkhu khamtam ïa kito ki longïing kiba duk kiba shem jingeh bad ka ban long ruh ka jingïarap ban da na u slap ka lyer. “Na ka bynta ka jingsam ïa ki jingïarap, la ïoh ban jied khnang tang ïa kito ki longïing kiba dei hok ban ïoh ïa kitei ki tin sop ïing lyngba ka skhim CMHAP”, u la ong.
Katba ha ka jingkren jong u bah L.T. Tariang, MCS, Additional Deputy Commissioner bad Project Director ka DRDA, South West Khasi Hills District u la ong ba da ka jingsam bad aiti ïa kine ki tin sop ïing kan long ka jingïarap na ka bynta baroh ki longïing kiba donkam bad kyrmen ruh ba na ka por sha ka por da ka jingïoh ban sam kumne ka lah ban wanrah shibun ki jingmyntoi ha ki shnong ki thaw bad kumjuh ruh ba haba ki ïoh pdiang ki dei ruh ban pyndonkam hok ïa ki.
Ïa ka jingïalang ba lyngkot la pynlong ha ka Hall jong ka ophis u BDO, Mawkyrwat C&RD Block ha kaba u Block Development Officer (BDO) ka Mawkyrwat C&RD Block, u bah I. Lawrniang, MCS u la pynïaid ïa ka jingïalang ha ka jingïadon ryngkat u bah J. Nongsiej, u Chairman jong ka Chief Minister’s Housing Assistance Programme (CMHAP) Mawkyrwat Block, ki paidbah nongïoh jingïarap lyngba kane ka CMHAP scheme bad kiwei de ki ‘riew rangbah.