Kyrpad ka DS Mawryngkneng ïa u EM ban bsutlang ïa ka Land Ceiling hapoh ka Land Act 2021

Shillong, Naitung 20: U Executive Member jong ka KHADC u Bah khmih ïa la Land u Bah Powell Sohkhlet ha ka sngi Nyngkong u la pynpaw ïa ka jingkmen kaba khraw ba ka Dorbar Shnong Mawryngkneng hapoh ka jingïalam jong u Sordar u bah Peter Lawai bad ka Excutive Committee ka Dorbar Shnong ki la wan ban kyrpad ïa u ban bsut lang hapoh ka aiñ jong ka Land Bills 2021 ïa ka Land Ceiling jong ka Shnong kaba ki la pyntreikam mynta la palat khatarsnem, naduh u snem 2014.
U Bah Sohkhlet u la pynpaw ruh ka jingkmen ba ha ka sien kaba nyngkong ban ïohsngew ba ka Dorbar Shnong Mawryngkneng ka la don la ka jong ka Ceiling kaba buh pud ïa ki trai shnong ba kim dei ban die palat 20 hajar square feet sha ki briew kiba nabar kumta u la ong ba lada baroh ki shnong, ki Hima, ki Dorbar raid kin leh lang kajuh kan ïarap shibun ïa ka KHADC.
U Bah Powell Sohkhlet u la ïathuh ba haduh mynta ki dang don kiba sngewthuh bakla halor ka rule 16 kaba ong ba la pynduh noh ïa ka jingdonkam ka jingïasyllok bad ki Hima, ki Khlieh Nongsynshar Shnong bad ki Dorbar Raid, hynrei kane kam long kaba shisha naba la weng ïa kato ka mat bym donkam jingïasyllok hynrei baroh ka mat pat ka ai ka lad lada ki Dorbar Shnong, ki Dorbar Raid, ki Khlieh Nongshar shnong ki sngew ba ki don ban die ïa ki jaka palat ïa kaba la buh da ka KHADC ki lah ban pan NOC na ka Council bad ban ïoh da ka rai jong ka Dorbar Shnong ym tang katto katne.
U la ong ba ïa kane la leh na ka bynta ka jingmyntoi jong kito ki nongshong shnong ki bym lah ban thied jaka hynrei lyngba ki Khyndew raid ki lah ban ïoh shi lyngkhot ka jaka ban shna ïing.
Katba u Sordar shnong jong ka Mawryngkneng u Bah Lawai hadien ba la dep kynduh ïa u Bah Powell Sohkhlet u la ong ba ka jingthmu ba kynduh ïa u EM ka long ba ka rule jong ka shnong kaba la don baroh shi katta ka dei ban rung lang noh hapoh ka Land Act jong ka KHADC khnang ba nangne shakhmat kan ym tyngkhuh bad ki aiñ jong ka KHADC.
U la ong ba na ka liang u EM u la ong ba un shim khia ïa kane ka kam bad lada donkam ban ïasyllok un sakhot ïa ka Dorbar Shnong Mawryngkneng ban ïakren halor kane ka mat kaba kongsan ban ïada na ka jingsyntuid jong ka khyndew ka shyiap sha ki heh spah.
U la ïathuh ba hapoh Mawryngkneng dorbar shnong ka la shim da ka rai ban buh ceiling ïa ki trai jaka ba kim lah satia ban die ïa ki jaka sha kiba nabar kaba long palat ïa ka 20 hajar square feet, hynrei ïa kiba napoh shnong hi ki lah ban die ïa ki jaka kaba palat ïa ka 20 hajar tam.
Kumta u la ong ba ka jingbuh jong ka dorbar shnong ïa kane ka ceiling ka long ban ïada ïa ka jingsyntuid jong ki jaka puta khamtam sha ki riew shimet kiba dei ki heh spah, hynrei ban pynneh pynsah ïa ka khyndew raid bad ka khyndew shnong.