Shem jynjar bad kynduh jingeh ka longïing ba ban ka jingshitom ïa u khun

Khliehriat naitung 20: Kawei ka longïing kaba na shnong Umlaper East Jaiñtia Hills District, ka la iakynduh jingeh haduh katta katta na ka daw ka jingban khia ka jingshitom ïa u khun ka ïing, ha kaba une u heprit uba kyrteng u Riskhembha Khonglah, uba la don mynta 7 snem kyrta u la ioh ïa ka jingshitom ha kaba naduh ba kha ka kmie haduh mynta u une u heprit um lah ban iaid bad um nang ruh ban kren.
Na ka liang ka Hynñiewtrep Youth Council Narpuh Circle mynta ka sngi ka la leit ban jngoh ïa kane ka longïing ha shnong Umlaper bad ka seng lyngba u dkhot u samla Kitdorlang Mukhim, uba dei ruh u Vice President barim jong ka HYC Narpuh Circle, u la kyntu jur ïa ki tnat kiba don ha East Jaiñtia Hills District kiba dei peit ïa ka koit ka khiah bad kumjuh ruh ki tnat ba dei peit ïa ka bha ka miat jong ki khynnah kum ka ophis jong u District Medical and Health Office, ka tnat Child Protection bad ka tnat Social Welfare ba kin sngewbha ban shim khia ban peit bad iarap lem ïa u heprit Riskhembha Khonglah ba un ioh ki lad ki lynti ban phah sumar ïa u ha ki jaka sumar kiba biang. Shuh shuh na ka liang ka HYC Narpuh Circle ka ai ka jingkitbok kitrwiang ïa kane ka longïing jong u bah Poila Pdang ba kin ioh ki lad ki lynti ban ioh ban sumar ïa u khun jong ki ban ioh ïa ka koit ka khiah.
Na ka liang ka kmie jong u heprit Riskhembha Khonglah, ka kong Rolis Khonglah bad u kpa u bah Poila Pdang ki la pynpaw ka jingsngew khia namar ba une u khun jong ki u don ha kane ka jingshitom mynta la hynñiew snem, ha kaba ka la buh jingeh haduh katta katta ïa ki kum ki kmie ki kpa ban phah sumar ïa u khun namar ka jingduna ka ioh ka kot ha ïing ha sem
“Naduh ka por ba kha ïa une u khun mynta la hynniew snem tang ka jinglut beit ha kaba wad jingsumar kylleng-kylleng, ngi la rah phah sumar kat shaba ong ki briew ngi leit beit hynrei haduh mynta ym pat koit, dang ha kine ki sngi ngi lah dep phah test bad ki doctor ki ong ba ka jingshitom jong une u khun ka la jur bha bad lada phah sumar kan buh ka jinglut bad haba bun ka jinglut nga kum u kpa nga kynduh jingeh namar ka jing bym biang bha ki kam ki jam mynta ba kyrduh kam, ki khun ruh nga don khyndai ngut, te nga kynduh jingeh namar nga hap pyndap ruh ki jingdonkam ha ïing ha sem ha ka bam ka dih te ban pyndap sa ka bai dawai sa ka phah sumar ïa une u khun nga shem jingeh haduh katta katta, nga kyrpad ïa ki lok, ki jor, ki kur ki kha, ki para doh para snam ba kin sngewbha ban iarap ban kyrshan lem, ban wan jngoh lem ia ka ïing ka sem jong nga ” ong u bah Poila Pdang bad ha kajuh ka por lyngba u kyrwoh une u kpa ka ïing u kyrpad ïa kino kino kiba don ka mynsiem sngewlem ba kin sngewha ban iarap lem katba ki lah da kaba phah pisa lyngba ka gpay da kaba scan ïa kane ka QR Code.