Nongpoh, Lber 26: Uwei na u samla na Ri Bhoi District, u Samla Alber Maring na ka shnong Umdap u la kyntu ia ki khun samla ka Ri Bhoi bad ka jylla hi baroh kawei ba ngim dei ban don jingsngew la ngi trei ia kano kano ka kam.
Une u samla u la mih shakhmat ban kren halor ki kam ki jam, ka dei hadien ba bun ki khun samla jong ka District bad ka jylla hi baroh kawei ki ju kren shaphang ka jingkyrduh kam kyrduh jam bad katba kiwei pat ki nongwei ki wan ban trei ban ktah ha kane ka jylla namar ba kim don ka jingsngewpher ban trei ia kano kano ka kam.
Kum u wei na u samla u la pynpaw ruh ba ki samla jongngi kim dei ban sngewpoh ban trei ia kano kano ka kam, la ka dei ka kam rep ka kam riang, ka kam misteri, ka khapsniuh ka kam bylla sngi ne kiwei kiwei ki kam ha kaba bun ki samla ki khmih lynti beit ban ioh tang ki kam sorkar bad kiwei pat ki nongwei ki wan na kiwie ki jylla ban trei beit ia kano kano ka kam namar ba haba ki trei ia ka kam ki ioh ia ka bainong.
Shuh shuh, u la kyntu ruh ia ki samla jong ka bri u Hynñiewtrep ba kim dei ban sngewpoh ia kano kano ka kam la ka long kano kano ka jaid kam lait noh na ki kam thok ki kam shukor bad lada kum ki samla kin iai neh ban trei hok ia ka kam, ka kam hi kan sa ai buro ia ki, u la bynrap.
