M an la kawei pa kawei ka jaidbynriew kaba im ha kane ka snieh pyrthei ka im , ka roi ka man ka par namar ka ktien jongka ka ïai im bad ka hiar na kawei ka pateng ha kawei pat, da kumta ka jaidbynriew kaba nang bad ban niew kor ïala ka jong ka ktien, kiba pyndonkam hok shisha ïa ka, ym tang ba ka ïai im hynrei ka kylla long ka ri kaba khraw.
Haba ia phai sha la ka jong ka jylla, lehse ka kyntien Khasi kam dei satia kaba duk haduh katta, ym ba ka da riewspah, pynban lah ban ong baka shu long pdeng, namar ba ia ka ktien ka jong ka dang ïa kren ïa khana dang ïa thoh ïa tar ïa ka tad haduh kine ki sngi kiba mynta.
Pynban ka jingsdang ban kham ring sdot jong ka kyntien Khasi lah ban ong ba dei na ka jingbym ia kit khia lem da baroh baroh, khamtam lei lei na ki riew stad pule ba la pynjanai ïala ka kyrdan pule hala ka jong ka ktien. Ka mat kaba juh ia pur bad iakren ha kiba bun bah ki jingïalang ban pynriew spah ïala ka jong ka ktien, kam don ïa ka jubab kaba paka ban ai balei ba ka ktien Khasi ka nang ring sdot, hato kiei eh ki daw kiba pynlong ia ka ba kan long kumba ka long ha kane ka juk kaba mynta.
Ki mat kiba lehse kiba lah ban shu ïa pashat lyngba kane ka kolom ka long ba man la ki skul khamtam lei lei ki skul phareng haba don la ki jong ki khynnah, dei beit ha kaban sdang nak abynta ban pynshlur ia ki khynnah ba kin hap ba kin shim iaka sobjek Khasi kum kawei na ki kot pule ka jong ki, ne lada ka kham sngewlong kaba laitlan ne bym da mon ban ia shim kyllum da baroh ki khynnah, lehse lah ruh ban rai ba kan dei kum kawei na ki sobjek ba kyrpang (compulsory subject) tang naka bynta ki khynnah Khasi, khnang ba ka ktien ka jong ka kan iai im.
Ka jingeh kiba bun ki khynnah shong skul ka long ba ki kham salia bha ban shim ïa ka sobjek Khasi ha ki skul, namar ba ha ki, la plie lad ba ki lah ban jied da kiwei pat ki sobjek kum ka Alternative English kaba shiban ka kylla long ka dieng pynkiang bah ia ka ktien Khasi ba kan ioh ba kan rung ha man la ki jingmut jong ki khynnah. La bun bun tylli ki snem ba ia kum kane lad ban shim bujli ia ka sobjek Khasi da kiwei pat ki sobjek ka la hiar la bun bun pateng, kaba mynta pat ka kylla long kawei na ki mat kaba la ia sdang ban ia lyngba bad pisa ba ka ktien hi ka la nang lam sha ka lynti ba imat ka sdang ba kan duhjait.
Pynban hapdeng ka jingeh ba ka ktien Khasi ka don ha ka jingjah lynti, ki lad pathai khubor lehse ki la shim ïa la ka jong ka kamram ban bah ia ka lyngkor kaba khia naka bynta ban iai pynim ïa ka ktien lajong. Halor kane ka mat, sngew ban ai burom kaba khraw ia ki nongseng ia ki kot khubor, kiba hapdeng ka jingeh ba ki ia kynduh, ki iai pynmih kawei hadien kawei, ban pyrshang katba lah ha kaban pynim iala ka jong ka ktien da ki jingthoh kum ki khubor, ki artikle, ki khubor ka pyrthei ba pynwan sha ka ktien lajong bad kumta ter ter.
Hynrei hapdeng ka jingpyrshang naka bynta ban pynneh ïala ka ktien lajong, mih ka ishu jong ka jingbym beit ne bym biang pura ïa ki dak thoh ba pyndonkam hala ka ktien lajong, ne don ruh ki jait jingmut jong ki kyntien kiba dei kiba dang shu kha shen ia ki bad kaba eh shisha ha kaban pynwandur sha la ka jong ka ktien. Hangne la shem ba ka daw hi baroh ka long ba ki samla pule ba la kham pule bha ia ki kyrdan ba kham shalor ia ka sobjek Khasi, ki tyngkan eh iala ka buit ka bor ban iarap ha kaban sei ia ki kynja jingthoh ba ki la ngam jylliew naka bynta ban iarap lem ia ki lad pathai khubor ba kin sdang ban pynsaphriang lem ia ki kyntien ba thymmai sha ki paidbah nongpule salonsar.
Shuh shuh ka jingeh ia ka ktien Khasi ba kam lah ba kan kiew shakhmat, namar ba ki khynnah pule ha ki skul haba kim shim ia ka sobjek, ki la sdang ruh ban da klet syndon wat ha kaban kren ia ka ha la iing ha la sem. Ki kmie ki kpa ruh ki ailad iala kai khun ban kren noh da ki ktien nongwei, namar ba jur pat ka jingsarong ba hana ki khun kidei kiba la nang bad pnah bha ha kabna kren ia ka kyntien ki nongwei wat hala iing ha la sem. Phewse haba mih pat shabar nala ka jong ka jylla, haba iashem ba dia kynduh ia kiwei pat ki para jaidbynriew haba kylli ia ka tynrai wna long briew, kam te kam ba dei naka jaidbynriew Khasi, hynrei haba kren pat wat tang shi kyntien ruh ym nang shuh ban lait. Da kumta kiba bun na ki jaidbynriew kiba shem bad ia kynduh ki sdang ban shim pynban da kawei ka jingmut bad katta hi ka long ba pleng ba la shu bna satang kum ki khana pateng ba don teng katta ka jaidbynriew Khasi, kaba ka ktien ka jong ka la duh jait.
