Shillong, Lber 26 : Ka kynhun ïalehkai jong ka Rangdajied United FC ka la ïoh ban pynliem noh da 3-2 kol ïa ka Sawmer SC ha ka jingïakhun kaba mar ïa biang bor bha ha ka lympung ïalehkai jong ka SSA Shillong Premier League Division 2023-24 kaba long ha madan SSA Stadium.
Haba phai sha ka jingïalehkai ka Rangdajied ka la ïoh ban thep ïa ka kol kaba nyngkong tang ha ka minit kaba 11 jong ka kylla step lyngba u Enestar Malngiang bad tang ha ka minit kaba 25 u la ïoh biang sa shi kol na u Ieitlamg Syiemlieh.
Watla ka jingïalehkai ka long kaba mar biang bor hynrei tad haduh ban da kut ka kylla step dei ka Rangdajied kaba ïoh ban lamkhmat da 2-0 kol.
Dei tad ynda la poi ka jylla miet ba ka rukom ïalehkai ka la sdang ban kylla bad dei da kaneka rukom ïalehkai ba ka Sawmer ka la ïoh lad ban pynphai lang ar kol tang ha ki 10 minit.
Ïa kitei baroh ar tylli ki kol la ïoh ban thep da uMark Austin Wanswett ha ka minit kaba 55 bad kumjuh ha ka minit kaba 65 jong ka kylla miet.
Ka jingïalehkai ka la neh ha ka jingïakhaid a mar 2-2 kol haduh ka minit kaba 80. Dei ha ka minit kaba 82 ba ka Rangdajied ka la ïoh ban thep ïa ka kol jop na u Stephan Pale kaba pyntikna ïa ka kynhun ban khur suk ïa ki lai point na kane ka jingïakhun.
Ka jingïakhun ha kane ka sngi Balang pat kan long hapdeng ka Ryntih SC pyrshah ïa ka Shillong Lajong FC ha ka por 3:00 baje mynsngi.
