Shillong, Lber 26 : Ka Syntung Sports & Cultural Club lyngba ka jingkyrshan pisa da ka Yess Meghalaya, ha ka sngi Saitjaiñ jong ka taïew ba dang su dep ka la ïoh ban pynlong ïa kiba bun ki prokram na ka bynta ki heprit, ki samla bad ki longkmie longkpa jong ka shnong, ba kynthup ka jingpynmareh marathon, ka jingïalehkai kynjat bol, bad ka jingïakop pyni sap ïa kaba la tip kum ka Open To All Variety Talent Show 2024.
Ha ka 22 tarik Lber 2024 ha por mynstep la ïoh ban pynlong da ka Marathon ïa kaba la kaweh ïa ka lama da u Bah Tympang Pohshna uba dei u Chairman ka Block Mawkynrew kum u Kongsan.
Ha ka 23 tarik Lber ha ka por mynstep la pynlong ka jingpynïalehkai kynjat bol bad khatduh ha ka por janmiet la pynlong pat ïa ka jingïakop sei la ki sap ki phong lane ka Talent Show ba la ïashim bynta shitrhem naduh ki heprit, ki samla bad ki longkmie longkpa.
Ïa kane ka Talent Show la wan ban plie da u Sordar ka Shnong Syntung u Bah R. Pale kum u Kongsan, ha ka jingïadonlang u Bah Tympang Pohsna kum u Symbud Kongsan, Bah K Mukhim President ka Club, Bah S. Surong Secretary, la pynïaid ïa katei ka prokram da ka Kong S Dkhar.
Kiba ïashim bynta ha ka marathon ki don 298 ngut shynrang bad kynthei ïa kaba la phiah ha ki ar tylli ki group ka -U-12 bad ka U-15, ha ka phutbol ki don saw tylli ki team ba kynthup ka Ardong Combined United Football Club, ka N. N. N Football Club, ka Nongmukhim SC bad ka Ïatyllilang FC.
Ka N. N. N FC ka la long ka nongjop da kaba pynliem lyngba ka tie breaker da 5-4 kol pyrshah ïa ka Ardong Combined United FC. Ha ka Marathon, ïa ka nam jop ba nyngkong ha ka U-15 la ïohrah da u Fredison Dkhar, ba wan ba ar u Plieshai Nongrum bad ba lai la ïoh da u Mebaaibiang Lynshiang.
Ha kaba ïadei bad ka jingïakop pyni sap, ïa ka nam ba nyngkong la jop da ka Syntung V.O Group kaba pyni ïa ka sap rwai, ba ar la ïoh rah da u Phim Dkhar uba tem bad rwai bad ïa ka nam ba lai la ïoh rah da ka Sweety Mynsong kaba pyni ïa ka sap shad.
Ha kaba kut jong kane ka jingpynïakop pyni sap, la sam ïa ki khusnam sha baroh ki nongjop naduh ka jingpynïamareh marathon, ka jingïalehkai kynjat bol bad ka talent show. Ïa kane kaTalent Show la wan ban bishar da u samla Welbon Mynsong uba dei u tyngshop ïa uba la tip paidbah da u Paheh bad ka samla P. Syngkrem.
Ha kane ka sngi, ka prokram ka la long kaba ïaid beit ïaid ryntih bad kaba shongshit bha da ka jingwan ai mynsiem jong ki paidbah nongshong shnong ba kynthup naduh ki longkmie longkpa, ki samla kynthei bad shynrang haduh ki hep kiba rit.
Kane kadei ruh ka sien kaba nyngkong kaba ki paidbah jong katei ka shnong ki ïoh ban sakhi ïa ki sap ki phong ba ki para shnong ki la pynpaw pyrthei.
La ïadonlang ruh ha kane ka sngi, ki nongkitkam ka Syntung Sports & Cultural Club, ki nongkitkam Shnong, Bah Hansing Suting uba dei u samla rangbah jong ka thaiñ Mawkynrew bad uba la pynbit pynbiang ïa baroh ki jingdonkam ha kaban pynlong ïa kitei ki prokram ba la bei tyngka da ka Yess Meghalaya.
