Nongpoh, Lber 26: Ka ophis jong ka District Tuberculosis Officer Ri-Bhoi District mynta ka sngi kala rakhe ïaka sngi jong ka jingpang TB ne ka World TB Day kaba la ju rakhe haka 24 tarik Lber ha baroh kawei ka pyrthei bad ïa katei ka jingrakhe la pynlong ha Auditorium Hall jong ka Nongpoh Parish.
Ïa katei ka jingrakhe ïaka World TB Day la wan ban shim bynta da u Prof GD Sharma Vice Chancellor ka skul bah USTM, Dr SK Baruah na Purno A Sangma International Medical College USTM, G Burgohain WHO Consultant NTEP, Dr. TS Momin DMHO ka Ri-Bhoi, Dr. E. Kalwing District Tuberculosis Officer Ri-Bhoi, ki ophisar naka tnad ka koit ka khiah, ki nongmihkhmat naka Piramal Foundation ki khynnah skul bad kiwei kiwei ki riew rangbah.
Naka liang ka ophis DTO ryngkat bad ka Piramal Foundation kum ka jingpynphriang khubor bad ai mynsiem ïakiba don bynta ban rat diengkhong ïaka jingpang TB kala pynkup burom ruh ïaki jaka sumar, ki nongthoh khubor naka district, ka shnong ba lait naka jingpang TB bad kiwei kiwei.
Haba kren ha katei ka sngi naka liang u Prof GD Sharma kum u kongsan u la ai ka jingïaroh ïaka tnad ka koit ka khiah lyngba ka National Tuberculosis Elimination Programme kaba la ïakhun tyngeh ban rat diengkhong ïaka jingpang TB bad buh thong ruh ban pynduhjait ïaka jingpang TB shuwa u snem 2025.
U la ong ruh ba baroh u briew u don la ka jong ka rukom bam ka rukom dih bad ka jingkhlaiñ ka met ba ka jingpang ka lah ban khyrwit ha kano kano ka por hynrei kum ki paidbah ki dei ban phikir bad husiar ban bam ki jingbam ba tei ban lait na kano kano ka jait jingpang bad khamtam haba ki don kano kano ka jingsngew pher haka met ba kin leit phah test sha ki jaka sumar ba hajan.
Shuh shuh u la ong ruh ba kine ki jait prokram ki long kiba kongsan ban pynphriang ka khubor shaphang ka jingpang TB ba ki paidbah kin tip ïaki dak ki shin jong ka jingpang ban ai mynsiem ruh ïaki paidbah ba kim dei ban ibeiñ lane ñiewbeiñ ïa kiba ioh ïaka jingpang TB hynrei ban ai mynsiem ïaki ban dih tista ïaki dawai bad ban bam ki jingbam tei met ban lait na katei ka jingpang.
