Khliehriat, Lber 26: Ka Ophis ka District Tuberculosis Officer, East Jaiñtia Hills District hynne ka sngi ba Ar ka la rakhe ïa ka “World Tuberculosis Day” halor ka mat “Yes! We can end TB” ha ka jingïalang ba la pynlong hapoh Khliehriat West Community Hall, Khliehriat ha ka jingïadon ryngkat lang u Deputy Commissioner ka District u A. Baranwal, IAS kum u Kongsan nalor ka District Tuberculosis Officer (DTO), Jaiñtia Hills, ka Dr. E.B.V. Laloo, District Medical & Health Officer (DM&HO), East Jaiñtia Hills District, Dr. D. Shylla lem bad kiwei pat ki heh ka Tnat ka koit ka khiah, ki ASHA, nonghikai, ki khynnah skul bad kiwei kiwei.
Haba aijingkren kum u Kongsan ha ka jingïalang, u Deputy Commissioner u la ai khublei kyrpang ïa ki heh ka Tnat ka koit ka khiah halor ka jingpyrshang borbah ka jong ki ban pynlong ïa kiba kum kine ki prokram hapoh ka district ka ban iarap shibun ban pynshai sha ki paidbah halor ka jingma na ka jingshah ktah ha ka jingpang TB.
U Baranwal u la kdew ruh halor ka jingdonkam ban lap kham kloi ïa ka jingpang TB bad halor ka jingdonkam ban leit chekup barabor khnang ban pynlah ïa ki tnat ba dei khmih ba kin rat diengkhong ïa kane ka jingpang TB napoh ka district.Nalor kata u la kyntu ruh ïa kiba wan ïashim bynta ha ka jingialang ba kin ialap sha la ki jong kiba haïing hasem bad ki shnong ki thaw ha kaba iadei bad kane ka jingpang TB namar kam dei ka jait jingpang kaba ki briew kin shu leh klet.
Nalor kata u la pynpaw ruh halor ka jingdonkam ïa ka jingiashim bynta lang jong ki nongshong shnong khnang ban pynlah ïa ki tnat treikam ba dei khmih ba kin lah ban rat diengkhong ïa ka jingpang TB na ka Jylla bad ka Ri hi baroh kawei.
Katba na ka laing ka District Tuberculosis Officer, Jaiñtia Hills, ka Dr. E.B.V. Laloo ha ka jingkren ka la kdew halor katei mat jong ka ‘Tuberculosis Day,’ kata kaba ong “Yes! We can end TB” da ka jingiasnohkti lang ki dkhot hapoh ka imlang sahlang ban iakhun pyrshah ïa kane ka jingpang.
Nalor kata ka la ai ruh ka jingmynjur ha kaba iadei bad ka jingai jingshakri ba la tyrwa da ka Nikshay Mitras jong ka district kaba la iarap lem ha kaba iadei bad ki kam aijingiarap sha kito kiba pang TB hapoh ka district lyngba ka jingsam ia ki jingbam ba tei bad kiwei kiwei ki jingdonkam.
Kiwei pat ki bynt jong ka prokram ki kynthup halor ka jingai khusnam ïa ka shnong Shyrwang bad Tlangmoi kiba hap hapoh Saipung C&RD Block namar ka jingshah pynkup kum ki shnong kiba la lait na ka jingpang TB.
