Jowai, Lber 25: Ka Hynñiewtrep Integrated Territorial Organization (HITO) Laskeiñ Block Circle mynta ka sngi kala leit ban ïa kynduh ïa ka Branch Manager jong ka Meghalaya Rural Bank, Mookaïaw Branch West Jaiñtia Hills District.
Kane ka jingleit kynduh jong ka seng hapoh ka jingïalam u samla Khiejoit Niang uba dei ruh u President ka seng, ka long halor ka nongrim ban dawa jur na katei ka Branch ban buh noh ïaka kor ATM ha katei ka Bank khnang ba kan pynsuk ïa ki paidbah kiba donkam ban sei pisa.
Shuh shuh ka seng kala ïathuh naka por sha ka por kila ïoh ka jingujor halor ka jingshem shitom jong ki paidbah kiba donkam pisa haduh 2000/- tyngka da kaba ki hap ban ap baroh shi sngi.
Halor kane ka seng HITO kala ong lada long kumno kumno dei ban buh noh ïa ka ATM ha katei ka Bank, khnang ba ki paidbah kin khamsuk, ym tang kiba na katei ka shnong hynrei ïa ki shnong ba marjan jong ka thaiñ kumjuh.
