Rakhe ka ophis u DTO ïa ka sngi kyrpang ban long phikir ne ïada na ka jingjia takhuh kali

Mawkyrwat, Lber 26: Ka ophis jong u District Transportation Officer (DTO), South West Khasi Hills District ha ryngkat ki nongñiah kali ki la rakhe ïa sngi kyrpang ban tehlakam na ki jingjia takhuh kali ne ka Road and Safety Month/Week 2024 kaba ka phang ka dei, “Be a Road Safety Hero”, ba la pynlong ha ophis treikam jong u DTO, South West Khasi Hills District.
Ka jingthmu jong kane ka prokram ka long ban ai jinghikai ïa ki nongñiah kali bad ki paidbah ba kin long kiba phikir ha kaba ñiah kali bad kumjuh ruh ha ka jingïaid lynti jong ki khnang ban pynduna ïa ki jingjia ba sngewsih bad ki jingjia takhuh kali.
Ki nongkren kiba la ai jingkren ha kane ka sngi ki la ban jur ba haba ñiah kali la ka long ki kali kamai ne kali shimet dei ban long kiba ïa burom lem mar kylliang lyngba ka jingpyni jong ki ïa ka jinglong jem nud, long phikir bad pynduna ïa ka jingñiah stet namar da kaba leh kumta kan pyllait na shibun ki jingjia ba sngewsih.
U bah S.I. Laso, Assistant Executive Engineer jong ka PWD (Roads) Mawkyrwat Division ha ka jingkren u la pynkynmaw ïa ki katto katne ki dak thoh ne ki sign ba la buh ha ki surok kum ki jingthoh ba ïa dei bad ka jingpynïaid stet ïa ka kali (Speed Limit), ki jaka bym dei ban ai horn kum ki jaka ba don hajan ki skul, jaka sumar bad jan ïingname, ki jaka ba don u speed breaker, ki jaka ba long khun ne turning bad kiwei de ba ki nongñiah kali ki dei ban bud ryntih bad ïatreilang.
U bah Shangdiar, Staff Nurse napoh ka ophis u District Medical & Health Officer (DM&HO), South West Khasi Hills District u la pynkynmaw ïa kiba ïa dei bad ki katto katne ki bynta lada ki don ki jingjia-takhuh kali bad don jingmynsaw jong u ne ka briew ba haba ki lada lap ïa kiba kum kine ki khep dei ban ïarap mar mar ryngkat ka jingai jingtip hapoh hapoh ka tnad ka koit ka khiah lyngba ka 108 bad kumjuh ruh sha ka tnad pulit.
U bah R. Rymbai, SI Mawkyrwat Traffic Police Station u la pynkynmaw ïa ki bynta ba ki paidbah ki dei ban leh da kaba kin peit ïa kali bniah shwa ban sei ïa ka kali bad haba ki la ïaid ha surok ruh kin long kiba kohnguh bad burom ïa ki kyndon ba ka bthah kum kaba deng ïa u seat belt, ki nongñiah ar shaka ruh kin deng ïa ka jingda khlieh ne helmet jong ki la ka long u nongñiah bad uba shong hadien khhnang ban lait na ka jingmynsaw bad kiwei de ki jingbthah.
U bah P.K. Muttyent, Enforcement Inspector ha ka jingkren jong u u la pynkynmaw ïa ki katto katne ki kyndon ne jingbthah bad kumjuh ruh ïa ka jingdon jong ki jingjia takhuh kali hapoh jong ka Jylla Meghalaya ha u snem 2022 ki don haduh 157 tylli bad ki jingïap pat ki don 98 tylli. “Ban lait na ki jingjia ba sngewsih, kum ki nongñiah kali ki dei ban bud pyrkhing bha ïa ki kyndon”, u la ong.
U la pynkynmaw ruh ba katkum ka jinglap ha ka jinglum thup naduh u snem 2017 haduh u 2019 bun ka jingïap jong ki briew ha ki jingjia takhuh kali dei kito kiba ñiah ki ar shaka namar kim ju pyndonkam jingdakhlieh. Namarkata, u la buh ka jingkyrpad ïa ki paidbah ba kin long kiba husiar bad phikir bha ha kaba ïa dei bad ka rukom ñiah kali ne ki ar shaka.
Ha kane sngi la donlang naduh u bah W. Makdoh, District Transportation Officer (DTO), South West Khasi Hills District kum u nongpynïaid bad uba la lamphrang ïa ki jingthmu jong ka jingïalangjingïalang bad ka kong M. Lyngdoh ka la ai ki kyntien jingkhublei.