Nongstoiñ, Lber 26: Ka jingithuh jong ka sorkar ïa u synsar kum u mar rep, ka la long ka jingmyntoi kaba khraw ym tang ïa ki paitbah nongrep. Hynrei wat ïa ki nongkhaïi kiba dei ki trai jylla kiba ju shalan synsar da ki phew kali man u snem.
U Bah R.Kharsyntriew uwei na ki nongkhaïi synsar na West Khasi hills haba ïakren bad u nongthoh khubor, u la ong ba ha ki snem ba mynshuwa mynba ka sorkar kam pat ithuh ïa u synsar kum u mar rep, haba leit die synsar ha Shillong wat lada u kiew dor katno katno ruh ym ju kham ïohnong bun.
Ka daw ka dei namar ka jinglut ha kaba siew khajna ha ki khyrdop kiba dei ki khyrdop lum khajna jong ki hima Syiem, Sirdar bad ki khyrdop lum khajna jong ka District Council ka long kaba bun bha. Teng teng tang ka jingsiew ha ki khyrdop lum khajna haduh ban da poi ha Shillong, ka la poi palat phew hajar nalor ka jinglut ha ka bai permit, namar u dei u mar khlaw nangta sa ka bai thep bad ka bai kali kam dei shuh ka jinglut kaba rit.
U la ong ruh ba na ka liang jong u um lah khlem da ai khublei ïa u bah H.M.Shangpliang MLA ka Mawsynram, u ba la pynsngew sha ka sorkar ba kan ithuh noh ïa u synsar kum u mar rep, ha kaba ka sorkar ka la sngap bad ka la leh ïa kata na ka bynta ka jingmyntoi jong ki paitbah nongrep.
U bah Kharsyntiew u la ong ruh ba hadien ba ka sorkar ka la ithuh ïa u synsar kum u mar rep ruh, ka dang don ka jing shah khrong khajna haman la ki jaka. Hynrei dei tad hadien ba u bah Banteidor Lyngdoh u ba dei u Myntri ba peit ïa ka rep ka riang, u la shimkhia bad bthah ba kim dei shuh ban shim khajna ïa u synsar, kata naduh u bnai Naitung jong u snem 2019, ba baroh ki khyrdop lum khajna kim shym la khrong pisa shuh ïa ki kali kiba kit synsar.
Kumta na ka liang jong u u la pynpaw ïa ka jingsngew nguh kaba khraw bad u la ai khublei kyrpang ïa u bah Banteidor Lyngdoh, na ka bynta ka jingshim khia jong u na ka bynta ki paitbah nongrep ha ka jylla.
Nalor kata u la ong ba mynta u snem wat la ka ïew synsar kam da thikna bha, namar ka dor ka poi tang san phew haduh hynriew phew tyngka shi kilo, hynrei ka ma da duh nong than namar ba ka jinglut jingsep ha lynti kam don shuh kumba long mynshuwa.
