Kyntu ka HNYF ïa u Syiem Raid Marwet ban pynbiang ïa ki kot ki sla, shuwa ka jingpynbeit pud ka wat ba ar
Nongpoh, Nailar 10: Da ka jingsngewkitkhlieh ïa la ki jong ki jaka ka puta jong ka jylla naka jingshah klun jubor haka sorkar Assam, ki nongïalam bad ki dkhot jong ka Seng Hnniewtrep National Youth Front (HNYF) Northern Region ki la leit ban ïakynduh syndon ïa u Paiem Ken Syiem, Syiem ka Raid Marwet ha ophis treikam jong u kaba don ha 9 Mer Baridua ha kaba ki dkhot jong ka seng ki la ai ruh da ka jingthoh ban kyntu ïa u Syiem ban pyntikna ba ka Raid kan don ïaki kot ki sla kiba biang ha shwa ba ki ka jylla Meghalaya bad Assam kin sdang biang ïaka jingpynbeit pud haka wat kaba ar.
Naka liang ka seng lyngba katei ka jingthoh ka la buh ruh ka jingkyntu ïa u Syiem ka Raid Marwet ba ka jingpynthikna ïaki kot ki sla ka dei ban long hadien u snem 1972.
U Bah Markus Marten uba dei u President jong ka Seng u la ong ba ym lah ban len ba ki katto katne ki jaka kiba dang hap hapoh kane ka Raid ki lah thikna ba ki dei kiba dang hap hapoh u pud u sam jong ka Jylla Meghalaya, hynrei ki dei kiba la shong la sah da ki brew ki bym dei ki jait bynriew riewlum lane ki khasi hynrei ki dei kiba na kiwei pat ki jaitbynriew, hynrei kata kam dei ban long ka daw ba yn duh noh ïaki jaka hynrei kum ka Raid kaba peit ïaka khyndew ka shyiap ryngkat bad ka Hima u Syiem Mylliem kin pyntikna lyngba ka jingdon jong kitei ki briew ïaki kot jaka lane ki dulir khyndew ban pynthymmai man la ka snem khnang ba kitei ki jaka kin skhem ka jinglongtrai hapoh ka jylla Meghalaya.
U la ong ruh ba hooid ka jingpynbeit pud kam dei ba suk, ha kaba kila don ruh ki shnong kiba sah da kiwei pat ki jaitbynriew haka thaiñ khappud ki thmu ruh ban leit sha Assam watla tip shai ba kidei ki jaka kiba dang hap hapoh u pud u sam ka jylla Meghalaya, dei halor katei ka nongrim ba naka liang ka seng ka kyntu ïa u syiem ba u dei ban lum ban lang ïakitei ki shnong bad ban pynbiang ïaki kot ki sla ba kitei ki jaka kim dei ban leit sha Assam hynrei ban long katkum ki kot ki sla.